Дьокуускай маастар-былаанын чэрчитинэн биэс бырайыак бэлэм. Өссө 14 эбийиэк олоххо киирии араас түһүмэҕэр баар, онтон барыта 90-ча эбийиэк олоххо киириэҕэ. Бу туһунан «Россия 24» телеханаалга «Куораты кытта быһа эфир» бырагыраама кэмигэр Дьокуускай куорат баһылыга Евгений Григорьев эттэ, диэн ЯСИА иһитиннэрэр.
«Биһиги маастар-былааммыт федеральнай докумуон буолар. Президент сорудахтарыгар олоҕуран, уһун болдьохтоох комплекснай былаан таҕыста, алтынньыга Россия премьер-миниистирин таһымыгар саҥардыыны ааспыта», — диэтэ.
Билигин маастар-былаан быһыытынан биэс бырайыак олоххо киирдэ: Саха политехническай лицей эбии тутуута, Өрөспүүбүлүкэ болуоссата, Роман Дмитриев аатынан кытыл, Сайсары күөл кытыла уонна дьиэ тутуутун кэмбинээтин саҥардан биэрии.
«Биһиги өссө маастар-былааҥҥа киллэриллибит 90-ча бырайыагы олоххо киллэриэхтээхпит. Бүгүн олоххо киирии араас түһүмэҕэр 14 бырайыак баар. Бу түөрт оскуола, икки оҕо саада, культура уонна спорт икки тэрилтэтэ буолар», — диэтэ Евгений Григорьев.
