Муус устар 1 күнүттэн Саха сиригэр «Бүлүү» уонна «Халыма» федеральнай трассаларга муус туорааһынынан таһаҕаһы таһар кыамта түһэн барыаҕа. Ону өрөспүүбүлүкэ тырааныспарга уонна суол хаһаайыстыбатыгар министиэристибэтэ санатар.
Өлүөнэ, Бүлүү уонна Алдан өрүстэри туорааһыннар тустарынан этиллэр, ол иһигэр Дьокуускай — Аллараа Бэстээх хайысханан барар.
Ол курдук муус устар 1 күнүттэн көҥүллэнэр уйуга 30 туоннаҕа, муус устар 8 күнүттэн 20 туоннаҕа диэри намтыаҕа, оттон муус устар 15 күнүттэн бары туорааһыннары сабарга былаанныыллар. Маныаха ыйыллыбыт дааталар барыллаан бэриллэллэр уонна муус, күн-дьыл туругуттан көрөн көннөрүллүөхтэрин сөп диэн этилиннэ.
«Көҥүллэнэр таһаҕаһы уонна муус суоллары сабыы дааталарын көннөрөр туһунан быһаарыы гидрометеорологическай мониторинг дааннайдарыгар олоҕуран ылыллар. Муус туруга болдьохтору кытаатыннарар кыахтаах», — диэн биэдэмистибэҕэ бэлиэтээтилэр.
Тиэйээччилэргэ-таһааччыларга, олохтоох былаастарга уонна олох-дьаһах хааччыйар тэрилтэлэргэ муус устар ыйга ыйааһыҥҥа хааччах биллэриллэрин учуоттаан, сезоннай суоллар сабыллыахтарыгар диэри бары наадалаах таһаҕаһы тиэрдиини кэмигэр хааччыйарга сүбэлииллэр.
