Атырдьах ыйын 13 күнүгэр Таатта улууһугар СӨ бырабыыталыстыбатын бэрэссэдээтэлин бастакы солбуйааччы Дмитрий Садовников кыстыкка бэлэмнэнии үлэтин уонна тутуу хаамыытын билистэ. Ол туһунан Таатта улууһун дьаһалтата биллэрэр.
Бырабыыталыстыба делегациятыгар тутаах министиэристибэлэр салайааччылара үлэлээтилэр. Тутуу хаамыытын Таатта улууһун баһылыга Айаал Бурцев кэпсээтэ, эбийиэктэри көрдөрдө.
Ол курдук делегация Чөркөөххө модульнай спортивнай-культурнай саала, Дьохсоҕоҥҥо хочуолунай тутууларыгар сырыттылар. Ону таһынан Ытык-Күөлгэ «Манчаары оонньууларыгар» тутулла турар стадиону уонна многофункциональнай киини көрдүлэр.
