Амма улууһугар бүгүн СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников баһылыктаах оробуочай бөлөх кэлэн үлэлээн барда. Бэбиэскэҕэ үс боппуруоһу киллэрэн дьүүллэстилэр, суруйар «Амма олоҕо».
Ыраас уу, кытаанах бытовой бөх, полигон тутуута, уһуннук умайар хочуоллар – бу барыта СӨ Бырабыытылыстыбатын бэрэссэдээтэлин бастакы солбуйааччы Дмитрий Садовников кыттыылаах мунньахха көрүлүннэ. Чахчы бары боппуруостар нэһилиэнньэни олус долгутар уонна билиҥҥи кэмҥэ саамай быһаарыллыан наадалаах боппуруостар бэбиэскэҕэ киирдилэр.
Ол курдук Алтан нэһилиэгэр уонна Амма нэһилиэгэр ыраас ууну нэһилиэнньэҕэ тириэрдээх станциялар тутуулара хайдах баран иһэрин туһунан “СӨ ОДьКХ” ГУП генеральнай дириэктэрэ Виталий Чикачев иһитиннэрдэ. Маныаха бырайыактарга кыра мэһэйдэр бааллара билиннэ, ону сэргэ Аммаҕа станция тутуутугар сыаналар өрө тахсан бэдэрээччит аванса суумматын элбэтэргэ туруоруста.
Иккис, үһүс боппуруостары СӨ дьиэ-уот коммунальнай хаһаайыстыбатыгар уонна энергетикаҕа миниистирин солбуйааччы Наталья Готовцева туруорда. Кини сүрүннээн кытаанах бытовой бөҕү (ТКО) харайыыга Амма улууһугар аныгы полигоннары тутуу кэскиллэрин туһунан уонна 2020-21 сылларга судаарыстыба анал бырагыраама оҥорон көмө быһыытынан биэрбит автономнай хочуоллары туруоруу хайдах барбытын көрүү түмүктэрин билиһиннэрдэ. Онно биллибитинэн маннык оһохтор Чапчылҕаҥҥа – 3 уонна Эмискэ- 17 кэлэн турбуттар.
Ол гынан баран Чапчылҕаҥҥа үс оһох турбут эбит буоллаҕына, Эмис нэһилиэгэр ылбыт дьон биир да оһоҕу туруора иликтэрэ этилиннэ. Онон бу сылга маны быһаарарга эттилэр. Полигон тутуутугар улуус өттүттэн бэйэлэрин санааларын баһылык Николай Архипов, тутууга солбуйааччыта Виктор Смирников эттилэр, маны сэргэ билигин улууска ТКО оператора «Экологические системы Якутии», ХЭТ генеральнай дириэктэрэ Петр Алексеев, «Коммунсервис» МУП дириэктэрэ Иван Степанов, Амма нэһилиэгин баһылыга Михаил Артемьев кэпсэтиигэ кытыннылар. Абаҕа нэһилиэгин баһылыга Макар Тимофеев мунньахха Айылҕа харыстабылын миниистирин солбуйааччы Семен Яковлев баарынан, билигин баһаартан сэрэхтээх буолууга ирдэнэр минерализованнай балаһалары оҥоруу нэһилиэк сирин –уотун алдьатарын, маны нэһилиэнньэ сөбүлээбэтин тириэртэ.
СӨ Бырабыытылыстыбатын бэрэссэдээтэлин бастакы солбуйааччы Дмитрий Садовников хайа да ыарахаттар баар буоллуннар, олору быһааран Аммаҕа ууну ыраастыыр станциялар хайаатар да тутуллуохтаахтар, онно үлэлэһиэхпит диэн түмүктүүр тылыгар эттэ. Мунньах кэнниттэн оробуочай бөлөх миэстэтигэр баран полигон, кирдээх ууну ыраастыыр станция, ону сэргэ ыраас ууну өрүстэн хачайдаан нэһилиэнньэҕэ ситим нөҥүө тириэрдиэхтээх станция тутуллуохтаах сирдэрин баран көрдүлэр.
