Бу күннэргэ Дьааҥы оройуонугар СӨ Үөрэх уонна Наука миниистирэ Ирина Любимова салайааччылаах үлэлиир бөлөх сырытта. Бөлөх састаабыгар «Сосновый бор» сынньалаҥ киинин дириэктэрэ Яна Иванова, кини солбуйааччыта Галина Слепцова уонна Каадырдары бэлэмниир киин дириэктэрэ Мира Лебедева киирдилэр. Дэлэгээссийэ 5 нэһилиэнньэҕэ сырытта: Боруулаах, Боронук, Үөттээх, Адыаччы нэһилиэктэригэр, Дьааҥы куоратыгар уонна Баатаҕайга.
От ыйын 28 күнүттэн саҕалаан, Дьааҥы оройуонун баһылыга Владислав Иванов уонна Үөрэх салалтатын начаалынньыга Иннокентий Юмшанов дэлэгээссийэни сирдээн илдьэ сырыттылар. Боруулаахха орто оскуоланы, уһуйааны, «Көдөй» үлэ-сынньалаҥ лааҕырын көрдүлэр. Манна даҕатан эттэххэ, билигин Боруулаах орто оскуолатыгар хапытаалынай өрөмүөн иккис сылын бара турар, ол тухары оҕолор оскуола таһынан эбийиэктэргэ үөрэммиттэрэ. Саҥа үөрэх сылын саҥардыллыбыт оскуолаҕа саҕалыахтаахтар, онон боруулаахтар үөрүүлэрэ улахан.
Миниистир оскуола өрөмүөнүн сиһилии бэрэбиэркэлээтэ, болдьохтортон лаппа хаалбыттарын, бытаарбыттарын тоһоҕолоото. Оройуон, нэһилиэк, оскуола салалталарыгар бара турар үлэни күүскэ хонтуруоллуулларын эттэ. Ону таһынан, тутуу матырыйаалларын тобохторун тиэйиигэ субуотунньук ыытылларын дьаһайалларын, өрөмүөҥҥэ үлэлиир бөлөххө эбии улэһиттэри киллэрэллэрэ наадалааҕын бэлиэтээтэ.
Боруулаах уһуйааныгар сылдьан саҥаралларыгар мэһэйи көрөр оҕолорго аналлаах сайыҥҥы лааҕыр арыллыбытын кэпсээтилэр. Маны таһынан, үлэһиттэр уһуйаан олус тымныы муосталааҕын эттилэр.
Ирина Павловна ордук «Көдөй» лааҕыры биһирээтэ. Манна 18 оҕо үлэлиир уонна сынньанар – оҕолор түөртүү чаас күн аайы окко сылдьаллар. Бу үлэлэригэр оскуолаттан уонна Дьарыктаах буолуу кииниттэн хамнастаналлар. Миниистир маннык лааҕырдар олус туһалаахтарын бэлиэтээн эттэ уонна лааҕыр салайааччытын Илья Попову атырдьах ыйыгар Дьокуускай куоракка буолуохтаах үөрэх үлэһиттэрин мунньаҕар ыҥырда.
Дьааҥы куоратыгар дэлэгээссийэ оскуоланы уонна интэринээти көрдө. Манна сүрүннээн урукку РАЙПО дьиэтигэр олохтоммут интэринээт тымныытын эттилэр. Ааспыт сылга манна 18 оҕо олорбута. Ирина Любимова оскуола дьиэтин биир өттүн интэринээт гына оҥорорго сүбэлээтэ. Дьааҥы куоратыгар орто оскуола 2013 сыллаахха тутуллубута. 240 миэстэлээх оскуолаҕа 150 оҕо үөрэнэр буолан интэринээккэ миэстэ тахсан биэрэригэр усулуобуйа баара биллэр суол диэтэ.
Боронукка сылдьан былырыыҥҥы мотуохтартан эмсэҕэлээбит оскуола спортсаалатын көрдүлэр. Миниистир хапытаалынай өрөмүөҥҥэ сайаапка биэрэллэригэр сүбэлээтэ. «Модернизация школьных систем образования» диэн федеральнай бырагырааманан 120 мөл солкуобайга диэри көмө көрүллүөн сөбүн быһаарда.
Үөттээххэ коррекционнай оскуола оҕото аҕыйаабытынан сибээстээн уопсай орто оскуола оҥороллоро кэмэ кэлбитин эттилэр.
Адыаччыга оскуола олох эргэрбит, хаарбах өттүн сабыллара сөптөөҕүн тоһоҕолоотулар. Уонна Бөтөҥкөскө саҥа 120/70 миэстэлээх оскуола-саад тутуллуутун СӨ инвестиционнай бырагырааматыгар киллэрэр гына күүскэ үлэлэһэргэ олохтоох дьаһалтаҕа сүбэлээтилэр. Бу былаан олоххо киллэриллиэҕэр диэри оҕолору оскуола үөрэнэргэ сөптөөх өттүгэр, ону таһынан бөһүөлэк сынньалаҥ киинигэр уонна начаалынай оскуола дьиэтигэр наардаан үөрэтиэхтэрэ.
Баатаҕайга оскуола хапытаалынай өрөмүөнэ былааҥҥа эһиил баарын быһаардылар.
Манан оробуочай бөлөх үлэтэ ситиһиилээхтик түмүктэннэ.
Мария Макарова
