Бэҕэһээ Дьааҥы улууһун Адыаччы нэһилиэгэ олоччу ууга барда. Улуус кииниттэн 46 км тэйиччи сытар нэһилиэккэ, биэрэпис быһыытынан 900 кэриҥэ киһи олорор. Бүтэһигин бу курдук улахан уу 2008 сыллаахха кэлэн турардаах диэн нэһилиэк олохтооҕо, Адыаччы оскуолатын физикаҕа учуутала Любовь Корнилова кэпсээтэ.
-Уу кэлэр буолла диэн биһиэхэ иллэрээ күн биллэрбиттэрэ. Дьон бары малларын-салларын хомунан барбыттара. Биһиги сылгыларбытын үөһээ диэки тыаҕа үүртэлээбиппит, оттук маспытын уу илдьэ барбатын диэн саайталаабыппыт, уонна төһө кыайарбытынан дьиэ-уот малын үөһээ таһаарталыы сатаабыппыт. Хата биһиги дьиэбит сыбаайаҕа, үрдүк сиргэ турар буолан, аллараа эрэ өттүн уу ылла. Сыбаайата суох аллараа турар дьиэлэр олоччу ууга былдьаннылар. Биһиги урукку дьиэбитин эмиэ уу ылла, ол дьиэбитин ааспыт 2008 сыллааҕы уу ылан, бу саҥа сыбаайалаах үрдүк дьиэни туттубуппут.
Уу ылбыт дьиэтигэр олорор олус ыарахан, ордук биһиэхэ хоту олохтоохторугар. Кыһынын маннык дьиэ сылааһы туппат, сиигэ тахса турар, тэллэйдиир. Билигин даҕаны киэһэтин 7-8 эрэ кыраадыс сылаас, онон уу кэлэн олус тымныы, оһохпутун отто олоробут. Хата уоппут станцията үөһээ баар буолан уот баар. ЫБМ үлэһиттэрэ көмөлөһө кэлбиттэрэ. Дьиэлэрин ууга былдьаппыт дьон быстах кэмҥэ оскуолаҕа бааллар. Бөртөлүөт кэлэн дьахталлары уонна оҕолору улуус киинигэр илдьэр диэн буолбута эрээри, уу түргэнник кэлэн, түһэр сир булбатаҕа, онон дьону тыынан суолга диэри илдьэн баран салгыы анарааттан массыына тоһуйбута. Кыра оҕолоохтор, хат дьахталлар эрэ бардылар быһылаах, дьон үксэ дьиэлэрин маныы хааллылар. Төһө да тыҥааһыннаах быһыы-майгы буоллар, олохтоохтор холку буола сатыыллар. Бэҕэһээ олус күүстээх сүүрүктээх эбит буоллаҕына, билигин уу турар.
«Дамбаны бөҕөргөтөр дьаһаллар ылыллыбыттарын үрдүнэн, бэҕэһээ күнүс үс чаас саҕана уу олус элбээн, нэһилиэк ууга барда. Дэриэбинэ үрдүнэн барыта 202 олорор дьиэ баарыттан 36-та олоччу ууга былдьанна. Олохтоохтор үксүлэрэ үөһээ соҕус дьиэлэрдээх аймахтарынан тарҕанан олороллор. 12 киһи быстах олорор сиргэ баар, кинилэр ортолоругар — 5 оҕо», — диэн нэһилиэк баһылыга Иннокентий Юмшанов СИА-ҕа бүгүн сарсыарда иһитиннэрбитэ.
Иннокентий Юмшанов уу таһыма бытааннык намтаабытын бэлиэтээтэ: чааска 1 сантиметр кэриҥэ барар.
Дьааҥы улууһун сиригэр- уотугар барыта биэс ПВР баар Суордаахха, Томторго, Бөтөҥкөскө уонна Баатаҕайга.
Миэстэтигэр быыһааччылар үлэлииллэр. Олохтоохторго наадалаах көмө оҥоһуллар, нэһилиэнньэлээх пууннарга дамбаны бөҕөргөтүү үлэлэрэ ыытыллаллар. Дэриэбинэлэринэн бастакы наадалаах аһы-үөлү, уонна иһэр ууну тиэртилэр. Саха сирин баһылыга халаан уутуттан эмсэҕэлээбит Дьааҥы улууһун нэһилиэктэригэр хоромньуну түргэнник ааҕа охсоллорун сорудахтаата. Эмсэҕэлээбиттэргэ барыларыгар тустаах төлөбүрдэри оҥоруохтара.
Бүгүҥҥү хаартыскалары уонна видеолары Любовь Корнилова ыытта
