НВК САХА — Балаҕан ыйын 10 күнүгэр Усуйаана улууһун Уус Куйга бөһүөлэгэр өрөспүүбүлүкэ бырабыыталыстыбатын бэрэссэдээтэлин бастакы солбуйааччы Алексей Колодезников 2019 сылга Дьааҥы өрүһүнэн таһаҕас тириэрдии хаамыытын туһунан мунньах ыытта. Бу туһунан Ил Дархан уонна бырабыыталыстыба пресс-сулууспата иһитиннэрэр.
Бүгүҥҥү туругунан Усуйаана оройуонугар 64 625 туонна таһаҕас тириэрдилиннэ, бу көрдөрүү сыллааҕы былаан 93 %-гар тэҥнэһэр.
Дьааҥы оройуонугар уу суолунан таһаҕас тириэрдиитэ түмүктэннэ. Эбээн Бытантай оройуонун оттук уматыгынан хаччыйыыга ананар биир тыһыынча туонна ньиэп Баатаҕайга тиэйэн ыытылынна.
Мунньах кэмигэр Дьааҥы уонна Эбээн Бытантай оройуоннарыгар баар ОДьКХ салааларын, Усуйаана, Дьааҥы уонна Эбээн Бытантай оройуоннарыгар баар «Сахаэнерго» АУо уонна «Теплоэнергосбыт» АУо салааларын оттук саппааһынан, Усуйаана оройуонун таас чоҕунан хааччыйыы туһунан иһитиннэрдилэр.
Санатар буоллахха, атырдьах ыйын 8 күнүгэр Дьааҥы өрүскэ уу таһыма түһэн, «Уус Куйга — Нижнеянскай» хайысханан уу суудуналарын олоруутугар хааччахтааһын биллэриллибитэ. Билиҥҥи туругунан уу таһыма үрдээн, суудуналар сырыылара балаҕан ыйын 7 күнүттэн хат саҕаланна.
This post was published on 11.09.2019 10:08 10:08