Бэс ыйын 23 күнүгэр, Чурапчы улууһун Кытаанах нэһилиэгиттэн төрүттээх Сергей Яковлев корректировщик-наводчигынаан Василий Яковлевтыын Москуба куоракка ыытыллыбыт бойобуой сайпинг турнирыгар кылбар кыайыыны ситиспиттэрин туһунан сурах социальнай ситим нөҥүө тилийэ көппүтэ.
Биһиги бөлөхпүтүгэр, итинник иһитиннэрии кэлбитигэр I-кы Чеченскэй хампаанна уолаттара: “Тыый, ити баннерга турар Виталий Шаповалов диэн биһиги снайпербыт буолбатах дуо?” – Мирон Игнатьев биир бастакынан ыйыппыта. Онтон Амма улууһун Чакырыгар олорор бойобуой дьайыы бэтэрээнэ Прокопий Соловьев “чахчы кини быһыылаах ол саҕана хантараагынан сылдьара” диэн ахтыбытыгар, Иннокентий Варламовтаах “Кини-кини эбит, сэриини барытын кэрийэ сылдьабын, күлэн-үөрэн, кэпсээн-ипсээн уол оҕото этэ” дэстилэр.
Инньэ гынан гвардия старшай прапорщига, Арассыыйа спецнаһын разведчик-снайпера Виталий Николаевич бойобуой суола инньэ 1995-1996 сыллартан ыла саҕаламмыта чуолкайданна. Анал байыаннай дьайыыга сулууспатын кэмигэр кини 51 саастааҕа…
“Дед” дойдутун туһугар сулууспаҕа олоҕун 20 сылын анаабыта. Элбэх сиринэн, үгүс бойобуой эпэрээссийэлэргэ кыттыыны ылбыта биллэр. Снайпинг көрүҥүн уос номоҕор киирбит байыас, бэйэтин кэмигэр хас даҕаны көлүөнэ снайпердары үөрэтэн таһаарбыта, кинилэр ортолоругар Арассыыйа Дьоруойдара эмиэ бааллар.
Уолаттар ахтыбыттарын курдук кини олус чиэһинэй, кырдьык иһин өрүү охсуһар уонна куруук көмөҕө барарга аһаҕас, баай уопуттаах разведчик эбит. Шаповалов сулууспалаабыт кэмиттэн уопсайа холбоон 5-тэ Чечняҕа командировкаламмыта, хас биирдиитин болдьоҕун уһуна 1,5 сылга тэҥнэһэрэ. Онтон 2 сыл Сирийскай Арабскай Өрөспүүбүлүкэҕэ сулууспалаабыта, онно сылдьан “противотанковый дед” диэн аатынан киэҥник биллибитэ, ол туһунан уочарка “Деривация” диэн кинигэҕэ кытары киирбитэ. Сирияҕа бойобуой сорудахтары таһынан Хомс провинциятыгар итиэннэ Акербатскай эпэрээссийэлэргэ быһаччы кыттыылары ылбыта.
Анал байыаннай дьайыыга хара маҥнайгыттан кыттыыны ылан барбыта, төһө даҕаны убаастанар саллаат буоллар, Виталий Николаевич өрүү стройга баар буолара, атыттары кытары бойобуой сорудахтары чиэстээхтик толороро. Кини бойобуой суолларын ылбыт наҕараадалара кытары туоһулууллар: үс “Эр санаа” уордьан кавалера, “Хорсунун иһин”, “Суворов”, “Байыаннай килбиэн” I уонна II истиэпэннээх мэтээллэр, Оборуона министиэристибэтин наҕараадалара.
Соҕурууҥҥу СМИ-лэр, “Дед” өлбүтүн кэннэ Арассыыйа Дьоруойун званиетыгар түһэрилиннэ диэн суруйаллар.
Ааптар Сэмэн Жендринскэй
