Өрөспүүбүлүкэ баһылыга гражданскай уопсастыбаны сайыннарыыга граннар куонкурустарыгар сайаапкалары кулун тутар 20 күнүттэн 09.00 чаастан хомуйан саҕалаабыттара, диэн СИА регион баһылыгын уонна бырабыыталыстыбатын пресс-сулууспатыгар сигэнэн кэпсиир.
Сайаапкалары муус устар 18 күнүгэр диэри «One Click Yakutia» цифровой платформаҕа ылыахтара. Быйыл граннар суумалара 117 мөлүйүөн солкуобайтан таҕыста. Итинтэн 69 мөлүйүөн солк өрөспүүбүлүкэ бүддьүөтүттэн көрүллүөҕэ, атына бэрэсэдьиэн граннарын пуондатыттан үбүлэнэр.
Чурапчы улууһугар олохтоохтор көҕүлээһиннэрин өйүүргэ уонна сайыннарарга анал «Ресурснай киин» үлэлиир.
«Билигин биһиги кииммит 4-5 бырайыагы оҥорорго көмөлөһө сылдьар. Сатыыр өттүлэрэ сайаапканы бэйэлэрэ ыыталлар, биһиги сүбэҕэ наадыйар дьоҥҥо төһө кыайарбытынан көмөлөһөбүт. Холобур, Чурапчы нэһилиэгин 1 №-дээх оскуолатыгар «Дарханнар» диэн НКО сүрдээх көхтөөхтүк үлэлиир. Кинилэр былырыын эмиэ граҥҥа кыттарга холоно сылдьыбыттара», — диэн Ресурснай киин дириэктэрин солбуйааччы Саргылана Старостина кэпсиир.
«Былырыын «Поклонимся белым журавлям» диэн бырайыагынан Арассыыйа граныгар кытта сылдьбыппыт даҕаны, куонкурсу ааспатахпыт. Ол да буоллар, тустаах уопут ыллахпыт дии. Инньэ гынан, быйыл өрөспүүбүлүкэ таһымнаах граҥҥа кыттарга соруннубут. Темабыт «Школа интеллектуальной игры ГО». Биһиги оскуолабытыгар ГО оонньууга үөрэтэр улууска соҕотох тренер Надежда Гаврильевна Захарова үлэлиир, онон төрдүс сылын баҕалаах үөрэнээччилэр уруоктарын кэннэ ГО-ҕа дьарыктаналлар. ГО оҕо логическай толкуйун үчүгэйдик сайыннарар, ол иһин биһиги бу оонньууну киэҥник тарҕатыахпытын баҕарабыт. Билигин Саха сиригэр соччо аатырбат, дьиҥэ бу дьоппуон курдук өйдөөх омук сөбүлээн оонньуур оонньуута», — диэтэ «Дарханнар» түмсүү салайааччыта Екатерина Романовна Хоютанова.
«Улууспутугар анал бырайыактарынан дьарыктанар киин суох да буоллар, улуус дьаһалтата баҕалаах дьоҥҥо барыларыгар тустаах сүбэнэн көмөлөһөр. Урукку сыллары ылан көрдөххө, дьон ордук отчуот оҥорорго ыарырҕаталлар, ол иһин соччо ылса сатаабаттар. Ол да буоллар, син биирдиилээн кыттар былааннаах дьон бааллар, муус устар 18 күнүгэр диэри үлэлэрини чочуйуохтара. Өлөөн улууһугар ордук Арктикаҕа, эбээн норуотун култууратыгар сыһыаннаах бырайыактары сөбүлээн оҥороллор, — диэн социальнай боппуруостарга баһылыгы солбуйааччы Туяра Егоровна бэлиэтээтэ.
Граннар 16 хайысханан бырайыактарга бэриллиэхтэрэ, дьүүллүүр сүбэ састаабыгар анал үөрэҕи ааспыт 40 эксперт киирдэ.
«Хас биирдии бырайыагы икки эксперт көрүөҕэ. Быйыл бастакытын экспертэр үлэлэрэ федеральнай куонкурустар төлөбүрдэрин курдук төлөнүөҕэ. Онон экспертиза хаачыстыбата үрдүө диэн эрэнэбит», — диэн региоҥҥа ыччат министиэристибэтин баһылыгын солбуйааччы Андрей Сосновскай бэлиэтээтэ.
Санатан эттэххэ, быйылгыттан ыла байыаннай дьаһалга сылдьар дьону өйүүр сыаллаах граннар баар буоллулар. Ону тэҥэ, үгүс хайысханан, чуолаан, төрөөбүт тылга, волонтерскай үлэҕэ уонна патриотическай иитиигэ лимит улаатта.
Ону таһынан, быйыл регион баһылыгын гранын официальнай сайта саҥардылынна, ол түмүгэр билигин «НКО-ҕа» сыһыаннаах анал раздел баар буолла, манна интэриэһиргиир боппуруостары биэриэххэ, көмө көрдүөххэ сөп.
