Бөтүрүөп таҥара кэннэ, окко киирии саҕаланна. Сайыҥҥы күнү-дьылы былдьаһан, биир да ардаҕа суох күнү мүччү туппат соруктаах сорох нэһилиэктэр, хаһаайыстыбалар хайыы-үйэ киирэн оттуу сылдьаллар. “Сайыҥҥы биир күн дьылы аһатар” диэн өбүгэлэрбит уот харахха оруннаах этиилэрэ тыа сирин олохтоохторугар хайаан да тутуһулуннаҕына табыллар курдук.
Күндэйэ нэһилиэгэр сүөһү иитиитинэн олохтоохтук дьарыктанар “Трофянов В.А.” ИП хаһаайыстыбата окко киирбитэ балачча кэм буолбут, ардаҕа суох күннэри баттаһа ходуһаҕа буһа-хата үлэлии сылдьаллар. Биһиги бүгүн хаһаайыстыбаны иилиир-саҕалыыр Василий Трофяновтыын үлэ-хамнас туһунан кэпсэттибит.
– Василий Алексеевич, хаһаайыстыбаҕытыгар төһө сүөһүнү тутаҕыт?
– Ынах сүөһү кыралыын-улаханныын уопсайа 40-ча төбө кыстыахтаах, ыанньыкпыт 18 төбө.
– Окко хаһан киирдигит? Быйыл от үүнүүтэ хайдаҕый?
– Окко сыл аайы эрдэ киирээччибит, ый саҥатыттан, биир үксүн оттуур сирбит хайдах үүммүтүттэн көрөн. Быйыл үрдүк сир син үүнүө эбит да, “тиистээх отчут”– аһыыка элбэх. Номнуо от төҥүргэһин эрэ хаалларан эрэллэр. Күн бүгүнҥү туругунан 14 т оту оттоон күрүөнү буллардыбыт.
– Быйыл окко былааҥҥыт хайдаҕый?
– Быйыл оппут былаана 80 т. Билиҥҥитэ сирбит аҥаара, күөл кытыыта буолан, ууга сытар. Күһүҥҥэ диэри тартаҕына былааммытын толорор инибит дии саныыбыт.
– Тугунан, хас буолан оттуугут?
– Сайын аайы куораттан, Элгээйиттэн, Күндэйэттэн, Кутанаттан балтыларым, бырааттарым кэлэн көмөлөһөн абырыыллар. Дьахтар аймах ынах ыыр, эр дьон бары окко түһүнэбит. Биир шасси уонна ЛТЗ -60 тыраахтардары үлэлэтэбин.
– Василий Алексеевич, от үлэтин былдьаһыктаах кэмигэр быыс булан кэпсэппиккэр махтанабын.
Ааптар: Марфа Иванова, Сунтаар сонуннара хаһыат
