Хаҥалас улууһун Булгунньахтаах сэлиэнньэтин оҕо искусствотын оскуолата дойду президенэ Владимир Путин көҕүлээбит «Дьиэ кэргэн» национальнай бырайыагын олоххо киллэрии чэрчитинэн саҥа тэрил ылла. Эдэр талааннарга музыкальнай инструменнар атыыластылар, ол иһигэр классическай гитаралар, домралар, балалайкалар, акустическай пианино уонна байаан. Бу туһунан Саха Сирин култууратын министиэристибэтигэр иһитиннэрдилэр.
Итини таһынан оскуола аныгы дорҕоон тэриллэринэн арсеналы хаҥатта. Ону тэҥэ компьютернай техника, графическай планшеттар, гончарнай инструменнар, элбэх функциялаах тэриллэр, интерактивнай үөрэх босуобуйалара, оҕолору живописька, хореографияҕа уонна музыкаҕа үөрэтэр матырыйааллары атыыластылар.
«Ити барыта өрөспүүбүлүкэ култууратын эйгэтин өйөөһүҥҥэ туһуламмыт судаарыстыба 4 мөл.солк. көмөтө. Оҕолорбут хайаан да саҥа кыахтары туһанан, улахан айымньылаах үрдүктэри ситиһиэхтэрэ диэн эрэнэбин», — диэтэ култуура миниистирэ Афанасий Ноев.
Оскуола дириэктэрэ Александра Абрамова бэлиэтээбитинэн, национальнай бырайыак көмөтүнэн оҕону иитиигэ, үөрэтиигэ, култууратын үрдэтиигэ усулуобуйа тэриллэр.
«Преподавателлэр музыкальнай грамотаҕа аныгы методическай босуобуйалары уонна таблицалары туһаналлар, оттон үөрэнээччилэр саҥа музыкальнай инструменнарга уонна графическай планшеттарга үөрэнэллэр. Саҥа тэрил үөрэтии хаачыстыбатын үрдэтиэҕэ. Эдэр мусукааннары сайыннарарга табыгастаах усулуобуйаны уонна үөрэнээччилэр айымньыларын көрдөрөллөрүгэр эбии кыаҕы үөскэтэр», — диэн оскуола дириэктэрэ эттэ.
Быйыл тэрилтэ төрүттэммитэ 50 сылын бэлиэтиир. Билигин манна 243 үөрэнээччи искусство араас хайысхатынан үөрэнэр.
