Амма улууһугар бу сылга 20 баһаар түбэлтэтэ таҕыста. Уоттан сэрэхтээх буолууга тустаах үлэһиттэр былааннаах үлэни ыыталлар. Балаҕан ыйыгар баһаары сэрэтэр «Оҕолор» акция ыытылынна. Алтынньы ыйга аны үс маннык ис хоһоонноох тэрээһин ыытыллара күүтүллэр.
СӨ баһаары утары охсуһар судаарыстыбаннай сулууспатын Амматааҕы этэрээтэ балаҕан ыйын устата баһаары сэрэтэр «Оҕолор» диэн акцияны ыытта. Амма, Соморсун, Бөтүҥ, Абаҕа, Болугур, Чакыр, Алтан нэһилиэктэрин үөрэх тэрилтэлэригэр барыта 30 тэрээһин ыытылынна. Билии күнүттэн саҕалаан кылаас чаастара, аһаҕас уруоктар, араас үөрэтэр дьарыктар буоллулар. «Аһаҕас аан күннэригэр» 255 оҕо баһаарынай чаастарга экскурсияҕа сырыттылар. Баһаары сэрэтэр, баһаар кэмигэр бэйэни салайыныы дьарыктара, эвакуацияҕа аналлаах үөрэхтэр 2697 киһини хаптылар. Баһаартан сэрэхтээх буолуу тематыгар оҕолор уруһуйдарын көрүү ыытылынна.
«Амма улууһугар сэттэ нэһилиэккэ баһаарынай чаас баар, онно барыта 97 киһи үлэлиир. Бу сылга Амма улууһугар барыта 20 баһаар түбэлтэтэ таҕыста. Ол иһигэр 1 чааһынай дьиэ, 2 гараж, 4 баанньык, 3 тэрилтэ дьиэтэ, 1 массыына о.д.а. бытархай баһаардар буоллулар. Алтынньы ыйга «Бары бииргэ куттала суох»,«Гражданскай көмүскэнии», «Ититэр ситим» акциялара буолуохтара. Маны таһынан үөрэх тэрилтэлэриттэн баһаарынай чааска сылдьан үөрэнэргэ «Аһаҕас аан күннэригэр» сайаапкалары хомуйабыт», — диэн этэр Амматааҕы 1№-дээх баһаарынай чаас начаалынньыга Василий Марков.
Ааптар: Алтана Артемьева, Амма улууһа
