Бэс ыйын 23 — 25 күннэригэр Саха сиринээҕи Госавтоинспекция тэрилтэ күүһүрдүллүбүт эрэһиимҥэ үлэлиэҕэ. Ол туһунан биэдэмистибэ пресс-сулууспата суруйар.
Ордук болҕомто уруулга итирик туруктаах олорор суоппардарга уонна суол быраабылатын куруубайдык кэһээччилэргэ ууруллуоҕа. Бээтинсэттэн баскыһыанньаҕа диэри өрөспүүбүлүкэ суолларыгар күүһүрдүллүбүт нэрээт үлэлиэҕэ.
Инспектордар итирик туруктаах, бырааба суох сылдьааччылары, утары суолга тахсааччылары, дьону тиэйии-таһыы быраабылатын кэспиттэри тутууга сыаллаахтык үлэлиэхтэрэ. Маны сэргэ сатыы хаамааччылар уонна мототырааныспардаах дьон ПДД тутуһалларын ирдиэхтэрэ.
«Лена», «Халыма», «Бүлүү» федеральнайдааҕы тыраассаларга постар үлэлиэхтэрэ.
Суол быраабылатын кэһэр, суолга кутталы үөскэтэр суоппардары көрдөххүтүнэ бу нүөмэрдэргэ эрийэн биллэриҥ: 127, (4112) 35-22-22, (4112) 47-35-69, 102.
