Дьокуускайдааҕы култуура уонна ускуустуба коллеhа «Күн өркөн» диэн уопсастыбаннай бириэмийэни 2013 сыллаахха олохтообута. Манна ирдэбил быһыытынан култуура эйгэтигэр үрдүк таhаарыылаах үлэлээх колледж выпускниктара бэлиэтэнэллэр. Быйыл дуорааннаах тэрээһин муус устар 10 күнүгэр Суорун Омоллоон аатынан Опера уонна Балет тыйаатырыгар ыытыллаары турар. Тэрээһин туһунан методист Василий Бачьевтан токкоолостубут.
«Бу бириэмийэнэн уопсайа 27 киhи бэлиэтэммитэ. Тэрээһин дьон-сэргэ болҕомтотун улаханнык татта, балаһыанньатын кэҥэтэри туруорсааччы да элбээн иһэр. Ол учуоттанан, эhиилгиттэн үөрэх кыhатыттан тутулуга суох, үрдүк көрдөрүүнү ситиспит култуура эйгэтин үлэhиттэрэ бэлиэтэнэр буолуохтара. Маны сэргэ, быйыл сүрүн уратынан — тэрээһин маастар-кылаас быһыытынан ыытыллара буолар. Бу сонун сүүрээн култуура эйгэтин үлэhиттэригэр билиилэрин-көрүүлэрин хаҥаталларыгар, байыталларыгар, сатабылларын үрдэтэллэригэр көмөлөөх буолуоҕа. Маастар-кылааска кыттыбыт кэллиэгэлэрбитигэр Туоhу суруктар туттарыллыахтара», — диэн эттэ.
Василий Афанасьевич долгутуулаах дьоро киэһэ түһүлгэтигэр Туой-Хайаҕа эдэр ырыаhыттар өрөспүүбүлүкэтээҕи күрэстэрин кыайыылааҕа, Гран-При хаhаайката, «Эстрада ырыата» салаа 3 кууруhун устудьуона Айыына Баишева; Саха сирин айар ыччатын аар-саарга аатырдыбыт «Өркөн» үҥкүү норуодунай ансаамбыла; Арассыыйаҕа, Саха сиригэр ыытыллар ырыа күрэстэрин кыайыылаахтара, «Хор дирижера» салаа хора; уус-уран айымньыны, сиэри-туому бар дьоҥҥо тарҕатааччы «Этнохудожественнай айымньы» уонна «Театральнай айымньы» салаалар бөлөхтөрө уо.д.а. кыттан көрөөччү сүрэҕэр-быарыгар, өйүгэр-санаатыгар умнуллубат үөрүүнү, эдэрдии эрчимнээх өрүкүйүүнү бэлэхтиэхтэрэ диэтэ. Онтон дьоро киэһэ ыалдьыттара оhуохай түһүлгэтигэр кытталларын сэргэ, колледж бэтэрээн-преподавателлэрин көрсүөхтэрэ, кинилэр санааларын истиэхтэрэ.
