Балыктаахха «Мэҥэ нэһилиэгэ» тыа сирин түөлбэтин дьаһалтата, М.П.Габышев аатынан орто оскуола кэлэктиибэ, олохтоох култуура дьиэтэ биир сүбэнэн тэрийэн быйылгы 2023 сылга Дойду үрдүнэн биллэриллибит Уһуйааччы уонна аҕа сүбэһит сылыгар уонна Учуутал күнүгэр аналлаах тэрээһини ыыттылар.
Тэрээһин бастакы чааһыгар Балыктаах бөһүөлэгин ыччатын үөрэппит, үтүөҕэ-кэрэҕэ уһуйбут, нэһилиэк уопсастыбаннай, култуурунай, спортивнай олоҕор олоҕор үгүс кылааттарын киллэрсибит педагогическай үлэ бэтэрээннэрин Марфа Петровна Харитонованы, Александра Петровна Дохунаеваны, Марфа Иннокентьевна Ноговицынаны, Александра Николаевна Габышеваны, Ия Васильевна Кычкинаны, Яков Константинович Стручкову, Любовь Васильевна Кычкинаны чиэстээтилэр.
«Мэҥэ нэһилиэгэ» тыа сирин тэриллиитэ баһылыга Александр Валерьевич Куприянов билигин үлэлии сылдьар кэлэктииби, ытык-мааны бэтэрээннэри учуутал күнүнэн истиҥник эҕэрдэлээтэ. Анал бэлиэлэри, Эҕэрдэ суруктары туттартаата. Улуус баһылыга Дмитрий Тихонов Махтал суруктара Александра Николаевна Габышеваҕа педагогическай үлэ бэтэрээнигэр, Светлана Антоновна Габышеваҕа математика учууталыгар, Татьяна Артуровна Стручковаҕа алын кылаас учууталыгар, Яна Ильинична Габышеваҕа биология, химия учууталыгар ананнылар. «Мэҥэ нэһилиэгин» дьаһалтатын Махтал суругун Евдокия Михайловна Стручкова алын кылаас учуутала, Күннэйэ Николаевна Цыпандина саха тылын учуутала, Гаврил Серафимович Олесов физика, информатика учуутала туттулар.
Балыктаах орто оскуолатын дириэктэрин эбээһинэһин толорооччу Егор Николаевич Иванов эҕэрдэ тылын, сибэкки дьөрбөтүн, оскуола үөрэнээччилэрин ааттарыттан сэмэй бэлэхтэрин педагогическай үлэ бэтэрээннэригэр туттарда.
Тэрээһин иккис чааһыгар билигин үлэлии сылдьар оскуола учууталлара үлэлэрин саҕалыылларыгар күүс-көмө буолбут аҕа саастаах настаабынньыктарын туһунан видеонан сырдатан, өр сыл ларга математика учууталынан үлэлээбит Марфа Захаровна Федорова туһунан Светлана Габышева, нуучча тылын учууталын Татьяна Петровна Свинобоева туһунан Ангелина Говорова, саха тылын учуутала Парасковья Прокопьевна Габышева туһунан Сардаана Молукова киэн тутта кэпсээтилэр.
Тэрээһин үһүс чааһыгар быйылгы 2023‒2024 үөрэх дьылыгар саҥа үлэлии кэлбит эдэр педагогтары билиһиннэрэн, интэриэһинэй боппуруостардаах тургутууну ааһан айымньылаахтык үлэлииргэ, нэһилиэк уопсастыбаннай олоҕор көхтөөх кыттыыны ыларга андаҕар биэрэн, кэлэктиип кэккэтигэр көхтөөхтүк киирэргэ бэлэмнэрин биллэрдилэр. Быйыл Егор Иванов дириэктэр эбээһинэһин толорооччунан, Гаврил Дьяконов технология, Александра Семенова физкультура, Айыына Олесова 1 кылаас, Иван Прибылых муусука учууталынан ананнылар. Боропсойуус бэрэссэдээтэлэ Сардаана Молукова кэллиэгэлэригэр истиҥ эҕэрдэтин тиэртэ.
Үөрүүлээх тэрээһиҥҥэ эҕэрдэ нүөмэрдэргэ оскуола үөрэнээччилэрэ, кэлэктиип бары кыттан интэриэһинэй нүөмэрдэри бэлэмнээн көрөөччүлэр сүргэлэрин көтөхтүлэр. Учуутал уустук идэтин баһылаан, үөрэнээччини билиигэ сирдиир, сырдыгы-кэрэни саҕа сылдьар учууталлар, үөрэнээччилэр уонна төрөппүттэр бииргэ түмсэн-үлэлээн оскуолаҕыт аатын ааттата сылдьыҥ диэн алгыс тылларын анаатылар ытыктыыр бэтэрээн учууталлара.
Мария Захарова, Эркээйи
