Байыаннай дьайыы кыттыылаахтарын дьиэ кэргэттэрэ дьиэ атыылаһалларыгар эбэтэр тутталларыгар эбии көмөнү ылыахтара. Көмө суумата дьиэ сыанатын 30-35% буолуоҕа, суруйда Саха сирэ саайт.
Бу туһунан дьаһалга РФ бырабыыталыстыбатын бэрэссэдээтэлэ Михаил Мишустин илии баттаата.
Ол курдук, төлөбүр 35 саастарыгар диэри эдэр дьиэ кэргэҥҥэ көрүллэр. Ыал оҕолооҕо, оҕото суоҕа оруолу оонньообот. Маны таһынан судаарыстыбаннай өйөбүлү 35 сааһыгар диэри саастаах соҕотох төрөппүт ылыан сөп. Көмөҕө наадыйааччы дьиэтин тупсарарыгар туһуланар.
Эрдэ маннык көмөнү үстэн элбэх оҕолоох эдэр дьиэ кэргэттэр, ол курдук 2005 сыл кулун тутар 1 күнүгэр диэри учуокка турбут ыаллар ылаллара. Билигин маннык быраабы байыаннай дьайыы кыттыылаахтарын дьиэ кэргэттэрэ туһаныахтара. Көмө харчыны ипотеканан дьиэ атыылаһарга эбэтэр дьиэ туттарга туһаныахха сөп.
