Бүлүү улууһугар коронавирус инфекциятын тарҕаппат туһугар оройуон кыраныыссатыгар ДПС сулууспатын сотрудниктара уонна киин балыыһа үлэһиттэр дьуһуурустубалыыллар. Айанньыттары тохтотон анкета толоттороллор, температураларын мээрэйдииллэр.
Бүлүү территориятыгар бэрэбиэркэлиир пуун муус устар 1 күнүгэр федеральнайдааҕы трасса А-331 кэрчигэр тэрилиннэ. Дьокуускайтан айаннаан кэлбит массыыналары тохтотоллор. Суоппары уонна пассажирдары мобильнай ФАП-ка бэрэбиэркэлииллэр. Анкета бүтэһик икки нэдиэлэҕэ айанньыт ханна сылдьыбытын быһаарар.
Санатар эбит буоллахха, Саха сирин хас да улууһугар куораттар икки ардыларыгар сылдьар такси сулууспаларын үлэтэ хааччахтанна.
