Бүлүү оройуонугар ойуурга «Союз-2-1а» аракыата тобоҕо көһүннэ. Салгыы ыам ыйын 25 күнүгэр Алдан оройуонугар аракыата тобохторун көрдүүр үлэ ыытыллыаҕа. Бу туһунан Саха сиринээҕи Быыһыыр сулууспата иһитиннэрдэ, суруйар Саха сирэ саайт.
Көрдүүр үлэлэри Саха сирин быыһыыр сулууспатын үлэһиттэрэ уонна «Роскосмос» бэрэстэбиитэллэрэ ыыттылар.
«Ыам ыйын 20 күнүгэр аракыата түспүт миэстэтиттэн буор боруобата ылылынна. Аракыата биир чааһа көһүннэ. Тобоҕу эвакуациялаатылар», — диэн өрөспүүбүлүкэ Быыһыыр сулууспатын аэромобильнай-быыһыыр подразделениетын начаалынньыгын солбуйааччы Павел Алексеев иһитиннэрдэ.
Санатан эттэххэ, былырыын сэтинньи 30 күнүгэр «Восточнай» космодромтан «Союз-2-1а» аракыата көтүтүллүбүтэ.
