Атырдьах ыйын 12 күнүгэр «Бүлүү» киинэ театрыгар, Россияҕа киинэ сылыгар, Бүлүүгэ киинэ ситимэ тэриллибитэ 50, кинопрокат 60 сылыгар анаммыт «Киинэ сырдаппыт суолунан» диэн өрөспүүбүлүкэ үрдүнэн аан маҥнайгынан бэчээттэнэн тахсыбыт кинигэ сүрэхтэннэ.
Бүлүү улууһун оройуонун муниципальнай тэриллии баһылыгын социальнай бэлиитикэҕэ солбуйааччы Венера Тихонова бу кинигэ өрөспүүбүлүкэҕэ бастакыннан тахсыбытынан, култуура уонна духуобунай сайдыы министиэристибэтэ бу ый 20 күнүгэр, национальнай библиотека киинигэр, история саалатыгар өрөспүүбүлүкэ таһымыгар кинигэ сүрэхтэниитин ыытарын туһунан эттэ.
Дьокуускай куоракка олорор, үлэлиир киинэ ветераннарын РСФСР уонна Саха АССР кинемотографиятын туйгуна, 1963-1992 сс. Госкино Саха сиринээҕи управлениетын начальнига Иван Жараев, Саха АССР кинемотографиятын туйгуна Виссарион Томскай, Саха сиринээҕи музей салааччыта, Саха Өрөспүүбүлүкэтин култууратын туйгуна Марина Винокурова ааттарыттан Бүлүү улууһугар үлэлээбит кинемотографистар тустарынан, историческай кинигэ бэчээттэнэн тахсарыгар үбүлээһинигэр улуус баһылыгар Сергей Винокуровка улахан көмөтүн иһин махтал тыллардаах телеграмманы ааҕан иһитиннэрдэ.
Улуус баһылыгын Сергей Винокуров аатыттан үөрүүлээх быһыыга-майгыга, кинигэни түмэн таһаарбыт, үлэлэспит автордарга махтал суруктары уонна Дьокуускайдааҕы киинэ бэтэрээнэ удостоверениетын, Мария Степановаҕа, Александра Васильеваҕа, Прасковья Ердашоваҕа туттартаата.
Кинигэ редактора, РФ суруналыыстарын Союһун чилиэнэ Андрей Яковлев: «Киномеханиктар дьиэ кэргэттэригэр улаатан, киинэ тыа сиригэр уонна киинэ үлэһиттэрэ уопсастыбаннай олоххо хайдах дьайалларын көрөн улааппыт буоламмын, киинэ биэрбит, үөрэппит кылаата оччотооҕу Сэбиэскэй кэмҥэ оҕо духуобунай өттүнэн сайдыытыгар оруола сүҥкэн улаханын бэлиэтиэм этэ. Хас биирдии нэһилиэк, киномеханиктара бу кинигэ суруллуутугар бэйэлэрин үлэлээбит кэмнэрин ахтыыларыттан уонна К.Е.Тимофеев үлэлэлии сылдьан оҥорбут араас дакылааттарын, ахтыыларын түмэн оҥорбут сыыппаралар кэпсииллэринэн, Бүлүү улууһугар киинэ ситимэ хайдах сайдан испитин көрүөххэ сөп».
Кини кинигэ историятын сырдатан кэпсээтэ: «Аҕам улуус киинэтин историятын сырдатар инниттэн, киинэ туһунан кинигэ тахсарын уруккаттан баҕарар этэ. Ол баҕатын толороору ахтыылары хомуйан, үлэлэһэн барбытым. Бу кинигэҕэ аҥардас дьон ахтыытыгар эрэ тирэҕирбэккэ, тус туспа атын хайысхалардаах. Улуус үрдүнэн киинэ сайдыытыгар оччотооҕу Сэбиэскэй кэмҥэ, киинэ үлэһиттэрэ хайдах үлэлээбиттэрин туһунан, кэлэр көлүөнэҕэ киинэ историятын үйэтитээри сырдаттыбыт».
Кинигэ редакционнай Сэбиэтин чилиэннэрэ: Бүлүү улууһугар киинэ эйгэтин кинигэнэн сырдатан, үйэтитэр сыаллаах көҕүлээбит, ылсан үлэлэспит, милиция подполковнига, СӨ бочуоттаах бэтэрээнэ Дмитрий Седалищев: «Бу кинигэҕэ киинэ эрэ буолбакка кинопрокат, киносеть уонна кинотеатр хайысхалара барыта холбуу киирдилэр. Бүлүү улууһугар маҥнай саҥата суох киинэттэн саҕалаан, киинэ ситимэ хайдах сайдыбытын көрдөрөн, кэлэр көлүөнэҕэ киинэ хайдах сайдыбытын көрдөрүү историятынан буолар».
Кинигэ матырыйаалларын түмэн, хомуйан таҥан оҥорбут ааптар, Россия кинемотографистарын туйгуна, СӨ култууратын туйгуна. Саха сирин киинэтин ветерана Надежда Михайлова: «Бүлүү улууһун киинэтин историятын сырдатар сыалтан, 2013 сылтан саҕалаан, кинигэ сүрүн матырыйаалларын, ахтыыларын хомуйан саҕалаабытым. Кинигэҕэ сүрүн матырыйаалбытынан К.Е.Тимофеев тус дакылааттара, рапортара улахан миэстэни ылла, ону тэҥэ кини учугэй салайааччы быһыытынан, хайдах салайан үлэлээбитэ көстөр».
РСФСР норуотун үөрэҕириитин туйгуна, СӨ үөрэҕириитин үтүөлээх үлэһитэ, Бүлүү улууһун уонна куоратын бочуоттаах олохтооҕо К.Е.Тимофеев кэргэнэ Мария Тимофеева: «Бу кинигэҕэ К.Е.Тимофеев туһунан элбэхтэ суруйбуттар, ахтыбыттар. Киинэ уонна кинотеатр сайдарын туһугар улахан кылаатын биһиги тоһоҕолуох тустаахпыт. Үлэ — дьол доҕуһуола диэн этэн туран киинэ абылаҥар сүрэхтэринэн ылларан, сыралаһан үлэлээбит дьон, кэргэним типографияҕа бу кинигэ тахсарыгар бииргэ үлэлээбит дьонугар Лидия Титоваҕа уонна кини кыыһыгар Екатерина Николаевнаҕа, ис сүрэхпиттэн махталбын биллэрэбин. Бүлүү кинотеатра өссө да үүнэ сайда, ыҥыра, дьону –сэргэни угуйа турдун диэн баҕа санаабын тиэрдэбин».
Кинигэ сүрэхтэниитигэр истиҥ иһирэх тылларын, эҕэрдэ бастыҥын этэн аастылар: Бүлүү кинотеатр менеджера А.В. Руфов, Дьокуускайдааҕы өрөспүүбүлүкэтээҕи киносеть директора П.А.Чиряев, Ньурба улууһуттан СӨ киинэтин бэтэрээнэ С.С.Алексеева уо.д.а.
Ааспыт кэмнэргэ умна быһыытыйбыт түгэннэри, оччотооҕу кэмҥэ ыытылла турар тэрээһиннэр кэмнэрин, санаан, ахтан ааһар курдук, видеороликтары холбоон, дьон-сэргэ уйулҕатын, сүргэтин көтөхтүлэр.
