Бүгүн батсаапка: «Киэһэ 9 чааска 21 бааллаах тыал түһэр. Бэҕэһээҥҥи 13 бааллаах үһү. Сэрэниҥ!»диэн ис хоһоонноох иһитиннэрии тарҕанна.
edersaas.ru
Гидрометеокиин Саха сиринээҕи салаата бэйэтин саайтыгар сууккатааҕы күнү-дьылы биллэрэ олорор. Ол онно бэлиэтэнэринэн, ыам ыйын 29 күнүн киэһэ 21.00 чааһыттан ыам ыйын 30 күнүн 21.00 чааһыгар диэри бу түүҥҥүнү ылан көрдөххө, хотугулуу-арҕааттан сөкүүндэҕэ 7-12 м тыаллаах. Күнүс сөкүүндэҕэ 5-10 м тыаллаах. Халлаан сарсын +17,+19° сылыйыаҕа.
Хата, ол оннугар ыам ыйын 31 — бэс ыйын 1 күннэригэр хоту улуустарга — ардах, хаар, киин улуустарга —кыралаан ардах, соҕурулуу-арҕаа улуустарга — этиҥнээх ардах. Онно сөкүүндэҕэ 15-20 м күүстээх тыал түһэрэ күүтүллэр. Бэс ыйын 21 күнүгэр киин улуустарга — +20-25 кыраадыс итии, соҕурулуу-арҕаа улуустарга — +23-28 кыраадыс итии. Онтон хоту улуустарга — +13, +18 кыраадыс сылаас. Түүн хоту — -3 тымныы, +2 кыраадыс сылаас. Онон тымныы уонна итии салгын эмиэ «охсуһар» эбиттэр.
Дьиктитэ баар, араас электроннай таһаарыылар бэйэ-бэйэлэригэр майгыннаспат күнү-дьылы ырытар иһитиннэриилэри таһаараллар. Буолаары буолан, Гидрометеокиин Саха сиринээҕи салаата бэйэтин саайтын иһитиннэриититтэн эмиэ атыннар.
Онон интернеттээх дьон «Якутское УГМС» диэн «гугллаатыгыт» да, күн-дьыл иһитиннэриитэ барыта судургутук тахсан кэлэр. Оттон бүгүҥҥү батсаап иһитиннэриитин болҕомтоҕо ылар туох куһаҕаннаах буолуой? Бу нэдиэлэни быһа кэтэнэ сылдьыбыт ордук — түннүгү-үөлэһи саба, оҕуруоту көрө-истэ сылдьыҥ…
Елена ПОТОЦКАЯ, «Саха сирэ» хаһыат, edersaas.ru
Хаартыска — интернеттэн.
