Күн-дьыл туруга биллэ тымныйдар даҕаны, Өлүөнэ өрүһүнэн 20 «подушка» дьону таһа сылдьар. Бүгүн уу тырааныспардара дьону тиэйиигэ-таһыыга харгыстары көрүстүлэр, үлэни эрдэ тохтоттулар.
Киэһэ 4 чааһы ааһыыта бүтэһик «Ирбис» Аллараа Бэстээхтэн командировкаҕа эрэ сылдьар дьону тиэнэн айаннаата.
«Бүгүҥҥү подушка сырыытын тохтотто. Мааҕын сарсыарда 8-тан үлэлии сылдьабыт. Суол олус ыарахан, хаста даҕаны моһуоктары көрсө сырыттыбыт. Уонна күн да киирдэ, мантан хараҥаҕа хайдах даҕаны дьону таһар кыахпыт суох. Сарсын подушка сылдьарын-сылдьыбатын мантан киэһэ быһаарыахтара«, -диэн Ирбис үлэһитэ Владимир биллэрдэ.
Өрүскэ гидрологическай балаһыанньа кытаатан, бүгүн, сэтинньи 12 күнүгэр, Жатай — Төхтүр — Жатай хайысхатынан паром сырыыта тохтотулуббутун санатабыт. Тустаах тэрилтэ иһитиннэрбитинэн, сэтинньи 13 күнүгэр уу туругуттан көрөн сырыыны сөргүтүөхтэрэ.
Икки биэрэк кытыытыгар элбэх киһи айаннара табыллыбакка хааллылар.
СИА хаартыската
This post was published on 12.11.2021 17:37 17:37