«Азия оҕолоро» VIII оонньуулар сэттис күннэрин түмүгүнэн бэҕэһээ наҕараадалары туттардылар. Хомсомуол болуоссатыгар сурдо-тустууга, чэпчэки атлетикаҕа, буулдьанан ытыыга, баскетболга, үҥкүү спордугар уонна дзюдоҕа бастыҥтан бастыҥнары чиэстээтилэр. Сэттэ күн түмүгүнэн Саха сирэ 49 мэтээллээх, ол иһигэр 12-тэ кыһыл көмүс, суруйар ЯСИА.
Бу күн спорт алта көрүҥэр 132 мэтээл оонньонно. Официальнайа суох хамаанданан зачекка Беларусь лидердээтэ, кинилэргэ 22 кыһыл көмүс мэтээллээхтэр. Бастыҥ көрдөрүүнү эстафетаҕа уонна баскетболга көрдөрдүлэр.
Хаартыска: Мария Горохова/ЯСИА
Хаартыска: Мария Горохова/ЯСИА
Кулгаахтарынан хааччахтаах спортсменнарга 62 кг диэри ыйааһыҥҥа кыайыылааҕынан Саха сириттэн Александр Никитюк буолла. Иккис миэстэни Сибиирдээҕи федеральнай уокуруктан Тихон Постников ылла, үһүскэ Уһук Илиҥҥи федеральнай уокуруктан Никита Рыбченков таҕыста.
52 кг диэри Монголияттан Баярсайхан Оюнтуяа бастаата, иккискэ Саха сириттэн Адилет Ефимов, үһүскэ – Начын Кара-сал Сибирдээҕи федеральнай уокуруктан.
44 кг диэри Сибиирдээҕи федеральнай уокуруктан Доржу Тулуш кыайда, иккис – Борис Оненко Уһук Илиҥҥи федеральнай уокуруктан, үһүс – Алгыстаан Колодезников Саха сириттэн.
Чэпчэки атлетикаҕа кыргыттарга 3000 м дистанцияҕа Узбекистантан Анастасия Сильченкова кыайда. Бу дистанцияҕа уолаттарга бастыҥынан Уһук Илиҥҥи федеральнай уокуруктан Георгий Шумков буолла, бу кини Оонньууларга ылбыт иккис кыһыл көмүһэ.
Анна Андреева Москваттан «Азия оҕолоругар» үһүс рекордун оҥордо, бу сырыыга «Куобах» национальнай ыстаныыга. Көрдөрүүтэ 18,48 м, троеборьета — 65,96 м. Үрүҥ көмүһү уонна боруонсаны Саха сириттэн Дарья Громова уонна Маргарита Тумакова ыллылар.
Куобахха уолаттарга Саха сириттэн Максим Семенов кыһыл көмүһү ылла, троеборьеҕа рекорд олохтоото — 114,53 м. Үрүҥ көмүһү Саха сириттэн Марк Никитин ылла. Боруонса Казахстан бэрэстэбиитэлигэр Глеб Клепиниҥҥэ ананна.
Ыраахха ыстаныыга Уһук Илиҥҥи федеральнай уокуруктан Лев Кукушкин уонна Москваттан Дарья Ветрова кыайыыны суруннулар.
Эстафетаҕа Беларусь хамаандата өрөгөйдөөтө. 400 м дистанцияҕа мэһэйдээх сүүрүүгэ Беларусьтан Екатерина Новик уонна Лев Кукушкин күннээтилэр.
Хаартыска: Мария Горохова/ЯСИА
Хаартыска: Мария Горохова/ЯСИА
Хаартыска: Мария Горохова/ЯСИА
