Хабаровскай кыраайга ойуур баһаарыттан кэлбит буруо Саха сирин киин өттүттэн тыал хайысхата уларыйдаҕына барыаҕа. Бу туһунан СИА-ҕа ГУБ «Авиалесоохрана» салайааччыта Владимир Леонов кэпсээтэ.
«Өрөспүүбүлүкэҕэ баар буруо Хабаровскай кыраайтан кэлэ турар. Тыалтан сылтаан буруо Саха сирин киин оройуоннарын диэки баар. Күн бүгүн Уус-Майа уонна Амма улуустарыгар, Дьокуускайга көстүү мөлтөөтө. Быһа холоон, чэппиэргэ, от ыйын 21 күнүгэр, тыал хайысхата уларыйыа, көстүүтэ быдан тупсуо», — диэн Владимир Леонов иһитиннэрдэ.
Леонов этэринэн, Саха сирин киин өттүгэр чугастааҕы кэмҥэ ардах түһүөҕэ, онон буруо Бүлүү өрүс диэки хайысхаланар күүтүллэр. Ойуур баһаара элбиирэ сабаҕаланар.
