«Эбийиэктэри тутууга матырыйаала барыта толору тиийэн турар. Ааспыт сылга сирин үлэтэ уонна уопсай тутар үлэ бүппүтэ. Быйыл сүрүн үлэ барар, тэриллэри туруоруу уонна холбооһун. Былаан быһыытынан, сыл бүтүүтэ кииннэр үлэлэрин саҕалыахтара», – диэтэ Арктика миниистирэ Владимир Черноградскай.
Саха сиригэр ТЛЦ-лар Ил Дархан Айсен Николаев сорудаҕынан 2021 сылтан тутуллан саҕаламмыттара. Бүгүҥҥү күҥҥэ уон киин баар: Анаабыр, Абый, Усуйаана, Булуҥ, Эдьигээн, Аллараа Халыма, Орто Халыма, Үөһээ Халыма, Дьааҥы уонна Муома улуустарыгар. Уопсай иэнэ 8 218 кв.м., ол иһигэр 1 372 кв.м. оҕуруот аһын харайыыга, 3 507 кв.м. сылаас ыскылаат, 424 кв.м. холодильнай камера.
