Ил Дархан Айсен Николаев көҕүлээһининэн, Арктика олохтоохторун өйүүр улахан бырагыраама чэрчитинэн биирдиилээн олорор дьиэлэри тутууга матырыйаал ананар. «Хаачыстыбалаах дьиэнэн хааччыйыы» судаарыстыбаннай бырагыраама чэрчитинэн, бу улуустар олохтоохторо дьиэ туттар матырыйааллары ылыахтара. Ыытыллыбыт матырыйаалларга буруус, СИП-панеллэр, дьиэ үрдүн илиистэрэ, пиломатырыйааллар уонна да атыттар киирдилэр.
Таһаҕаһы массыынанан тиэрдэллэр. Бырагыраамаҕа кыттар дьон матырыйаалларын АТЛК пууннарыттан ылыахтарын сөп.
Өрөспүүбүлүкэ тутууга миниистирэ Виктор Романов эрдэ бэлиэтээбитин курдук, бу өйөбүл дьаһала Арктикаҕа дьиэ тутуутун ороскуотун биллэрдик чэпчэтиэҕэ. «Урут биир бырысыап аҥаара тутуу матырыйаала 900 тыһ. солк. тиэрдиллэр эбит буоллаҕына, билигин бырагыраама кыттыылаахтарыгар босхо тиийэр. Бу ыраах сытар улуустарга кэтэх дьиэ тутуутун улаханнык чэпчэтэр», — диэтэ кини.
Тутуу министиэристибэтин пресс-сулууспатыгар эппиттэринэн, матырыйаалы ылбыт дьон икки сыл иһигэр дьиэ туттан, дьиэ-уот биир кэлим судаарыстыбаннай реестрыгар регистрациялыахтаахтар.
Бырайыак салгыы сайда туруоҕа. Кэлэр сылларга өрөспүүбүлүкэ Арктикатын улуустарыгар атыы-эргиэн уонна логистика кииннэрэ баар буолуохтара, хоту дойду дьонун аһынан-үөлүнэн эрэ буолбакка, тутуу матырыйаалынан хааччыйыы кыаллыаҕа.
