Россия бырабыыталыстыбатын бэрэссэдээтэлэ Михаил Мишустин «Арктика оҕолоро» Саха сирин тосхолун «Российскай Федерация Арктикатын социальнай-экономическай сайдыыта» бырагыраамаҕа киллэрэр туһунан сорудахха илии баттаата.
«Өрөспүүбүлүкэтээҕи тосхолго элбэх киһи үлэлээтэ, бастатан туран, Ил Түмэн сис кэмитиэтин бэрэссэдээтэлэ Феодосия Васильевна Габышева @feodosia_gabysheva, федеральнай таһымҥа РФ Федеральнай мунньаҕын Федерация Сэбиэтин бэрэссэдээтэлэ Валентина Ивановна Матвиенко @matvienko.vi, РФ президенин Уһук Илиҥҥи федеральнайдааҕы уокурукка боломуочуйалааҕа Юрий Петрович Трутнев, Уһук Илини уонна Арктиканы сайыннарыыга миниистир Алексей Чекунков @minvostok уонна да атыттар. «Арктика оҕолоро» тосхолу мин «Арктика: билиҥҥитэ уона инникитэ» IX норуоттар икки ардыларынааҕы форумҥа кэпсээбитим, 2019 сыллаахха. Онно элбэх регион биһиги көҕүлээһиммитин өйөөбүтэ», — Инстаграм-сирэйигэр Ил Дархан Айсен Николаев суруйда.
Регион баһылыга бырагыраама сүрүн хайысхаларын бэлиэтээтэ. «Биһиги тосхолбутун федеральнайдааҕы бырагыраамаҕа киллэрии оҕолорбутун өйүөҕэ, кинилэр доруобуйаларын тупсарыыга усулуобуйалары тэрийиэҕэ. Омук быһыытынан уратыбытын, тылбытын учуоттаан, талааннаах оҕолору, үөрэх тэрилтэлэрин өйүүр ситими сайыннарыаҕа. Көс оскуолаларга, дьыссааттарга үлэлиир педагогтары өйүүр эбии механизм хааччыллыаҕа. Оҕо билиигэ тардыһыытыгар, кини личность быһыытынан сайдыытыгар усулуобуйа тэрийии — биһиги үлэбит сыала», — суруйда баһылык.
Айсен Николаев бырайыагы өйүүр уонна олоххо киириитигэр үлэлэһэр дьоҥҥо махтанна.
This post was published on 16.03.2021 12:01 12:01