Саха АССР 100 сылын көрсө НВК «Саха» Инновация министиэристибэтин көмөтүнэн Арассыыйа биллэр анимационнай хартыыналарын сахалыы саҥалаах оҥордо. Мультиктар интернет-платформаҕа уонна телевидениеҕэ 1,5 мөлүйүөнтэн тахса көрүүнү хомйудулар. Бу туһунан Саха сирин инновацияҕа, цифровой сайдыыга уонна информационнай технологияҕа миниистирин солбуйааччы Георгий Андреев өрөспүүбүлүкэҕэ анимация киинэлэрин куукула дьыалатын сайыннарыы боппуруостарыгар сүбэ мунньахха иһитиннэрдэ диэн, СИА кэпсиир.
«2022 сыл кулун тутарыттан ахсынньытыгар диэри НВК «Саха» баазатыгар оҕо контенын оҥорорго 100-тэн тахса киһи кытынна. Ол редактордар-тылбаасчыттар, звукорежиссердар, композитордар, худуоһунньуктар, аниматордар, режиссердар, персонажтары саҥардар артыыстар. Хамаанда көмөтүнэн чахчы улахан уонна сыралаах үлэ ыытылынна, ол иһигэр 157 серия «Фиксики», 212 серия «Малышариктар», 48 серия «Тима уонна Тома», 104 серия «Три кота» мультиктары сахалыы саҥартылар. Идеяны дьон олус сэҥээрдэ, онон биһиги бу бырайыак үлэтин тохтотуохпут суоҕа», — диэн Георгий Андреев бэлиэтээтэ.
Миниистири солбуйааччы бэлиэтээбитинэн, 2023 сылга мультиктары сахалыы саҥардарга эрдэ үлэлии сылдьбыты студиялары эрэ кытта буолбакка, саҥа мультипликационнай студиялары кытта үлэлиэхтэрэ. Билигин сахалыы саҥалаах оҕо сыһыарыыта оҥоһулла сылдьар, манна эмиэ сахалыы контент бэчээттэниэҕэ.
