Долгуйар дьоллоох Дьокуускай куорат диэн ырыаҕа ылланарын курдук үгүс саха ыччата оскуоланы бүтэрээт, манна үөрэх туттарса, дьолун көрдүү кэлэр, оттон сааһыран истэҕин аайы олорор куоратын, таптыыр киһитин көрсөн ыал буолбут, оҕолоро улааппыт сирин өссө күүскэ таптыыр, ханна да сырыттын сүрэхтиин-быардыын тардыһар.
Олохтоох бэйэни салайыныы бэрэстэбиитэллээх уорганын, Дьокуускай куорат мунньаҕын бэрэссэдээтэлин солбуйааччы Феликс Романов куораты тупсарыыга, дьон олоҕун таһымын үрдэтиигэ туох үлэ ыытылларын туһунан кэпсээтэ.
Феликс Игоревич эдэр дьокутааттартан биирдэстэрэ, кини отутун туолуон иннинэ Строительнай уокуруктан дьокутаатынан талыллыбыта, билигин иккис ыҥырыыга үлэлиир, идэтинэн инженер-мэхээнньик, СӨ анал сибээскэ управлениетын начаалынньыга.
— Тапталлаах куораппытыгар оту-маһы хото олордон, уулусса аайы сиккиэр тыалга суугунуу турар чараҥы сэлэлии үүннэрэн таһаарыы ситэ кыалла илик, бу боппуруоһу быһаарарга куорат дьокутааттара ханнык сокуоннары ылыммыттарай?
— Куораппытыгар оту-маһы олордуу боппуруоһун дьокутааттар хас да ыҥырыыга дьүүллэһэн тураллар. Күн бүгүн куораты тупсарыы быраабылата диэн баар. Дьокуускай баһылыгын Евгений Григорьев куораты көҕөрдүүнэн дьарыктанар сүбэһитэ күөх үүнээйини көрүү-истии нормативын оҥорон бүтэрэн эрэр. Инникитин ол үлэ түмүгүн дьокутааттарга иһитиннэриэхтэрэ уонна куораты тупсарыы быраабылатыгар көннөрүүлэри киллэриэхтэрэ.
— Строительнай уокурук дьокутаата буоларыҥ быһыытынан, бу түөлбэни тупсарарга туох үлэ ыытылынна?
— Хас бээтинсэ ахсын 17-18 чааска диэри Строительнай уокурук управатыгар, Клара Цеткин уулуссатын 2 №-дээх дьиэтигэр биирдиилээн дьону кытта көрсөн, ким туох кыһалҕалааҕын кэпсэтэбит. Олохтоохтор араас ыйытыктаах кэлэллэр, хас биирдии киһи олоҕун таһымын тупсарыан баҕарар. Урбаанньыттары кытта сибээстэһэн, кыаммат ыалга көмөлөһөбүт.
Оройуон инфраструктуратын тупсарарга оҕо оонньуур былаһааккаларын саҥардабыт, алдьаммыт күрүөнү-хаһааны чөлүгэр түһэрэбит, тиэргэн иһинээҕи суолу, тас уулуссаны аспааллыырга үлэ ыытыллар.
Суолга сэрэхтээх буоларга тустаах хамыыһыйаны кытта үлэлэһэн, массыына ускуораһын хааччахтыырга суол бэлиэтин туруорарга, сатыы дьон суолу туоруулларыгар бэлиэни, светофор дублирующай сигналын оҥорорго о.д.а. миэрэни ыларга быһаарыныы ылыммыппыт.
— Дьокуускай куоракка күн сирин көрбүт киһи быһыытынан, эн оҕо сааһыҥ ааспыт кэмигэр куорат хайдах этэй?
— Оҕо сааһым сырдык өйдөбүлүнэн үгүс дьон дьоллоох Дьокуускай куоракка дьоллорун булаары, үчүгэй олоххо тардыһан кэлэллэрэ. Подъезка оҕо күлүүтэ чугдаарара, дойду араас муннугуттан кэлбит ыаллар биир иллээх дьиэ кэргэн курдук олороллоро. Билиҥҥи курдук уопсастыбаннай эйгэни тупсарарга үп-харчы көрүллүбэт этэ.
Дьокуускай сыл ахсын үүнэн-сайдан, тупсан-киэркэйэн иһэр, киин проспегы, Өрөспүүбүлүкэ болуоссатын саҥардыбыттарын кэннэ светомузыкальнай фонтаны көрөөрү элбэх киһи тоҕуоруһар буолла.
— Сорох дьон улахан киин куораттарга көһөн бараллар, эн ол туһунан биирдэ даҕаны санаабат этиҥ дуо?
— Мин, дьиҥэр, ханнык баҕарар куоракка олохсуйуохпун сөп эрээри, сүрэхпэр тапталлаах Дьокуускайым эрэ баар. Куораппын дьоно-сэргэтэ эйэҕэс-сайаҕас майгылааҕын, табыгастаах логистикалааҕын уонна биир күн иһигэр хас да дьыаланы ситиһиэххэ сөбүн иһин сөбүлүүбүн.
— Дьокуускай куорат 400 сылыгар ирбэт тоҥ үрдүгэр бастыҥ куорат ахсааныгар киириэхтээх, ол соругу ситиһэргэ туох нааданый?
— Үүнэр көлүөнэ Дьокуускайтан атын куораттарга бара сатаабатын, дойдутугар хааларын туһугар күүстээх үлэ ыытыллыахтаах. Төһө даҕаны тымныы-тыйыс айылҕалаах сиргэ олордорбут, дьон иллэҥ кэмин туһалаахтык атаарарыгар тупсаҕай уопсастыбаннай эйгэ арааһа тэриллиэхтээх. Сайыҥҥы кэмҥэ биир сүрүн кыһалҕа бурҕайа турар быылы хаптатыы, бу саамай тыын боппуруос дии саныыбын.
— Куораппыт өрөгөйдөөх үбүлүөйүгэр диэри 7 эрэ сыл хаалла, ити кэм устата эргэ мас хаарбах дьиэлэри барыларын көтүрүөхтэрэ, олохтоохтору саҥа дьиэҕэ көһөртүөхтэрэ дуо? 17 кыбаарталга иҥнэри-хаҥнары түспүт, самнархай мас дьиэлэр саахалланар туруктаах дьиэлэр испииһэктэригэр киирбиттэрэ эрээри, билигин даҕаны тураллар.
— Аны сэттэ сылынан эргэрбит мас хаарбах дьиэлэр боппуруостара быһаарыллыа диэн ис сүрэхтэн эрэнэбин, оттон 17 кыбаарталга аныгы дьиэ-уот тутуллан, дьон олороругар биир саамай табыгастаах оройуоҥҥа кубулуйуо. Маны ситиһэргэ өрөспүүбүлүкэ, куорат салалтата уонна дьокутааттар күүспүтүн түмэн үлэлиибит.
Ааптар Марианна Тыртыкова, Саха парламент саайт.
