Анголаҕа спорт уонна ыччат министиэристибэтин таһымыгар мас-рестлиҥҥэ Федерацияны тэрийэр санаа өйөннө. Өрөспүүбүлүкэҕэ саха национальнай спордун көрүҥүн аан дойду чемпионатын призердара Закариаш уонна Летисия Шиокалар көҕүлүүллэр. Ол туһунан аан дойдутааҕы мас-рестлинг Федерациятыгар кэпсээтилэр, диэн суруйда ЯСИА.
Миниистир Руи Луис Фалькао Пинту де Андрадены кытта мас-рестлиҥҥэ аан дойду чемпионатын боруонса призера Летисия Шиока көрүстэ. Онлайн эрэһииминэн киниэхэ убайа Закариаш Шиока холбосто, кини саха единоборствотынан дьарыктаммыта өр буолла.
Анголаҕа спортивнай федерацияны тэрийэргэ тустаах ирдэбиллэр бааллар. Ол курдук, киин куоракка биэс секцияттан итэҕэһэ суох уонна провинцияҕа үс секциянан итэҕэһэ суох аһыллыахтаах. Кинилэр оскуолаларга, университеттарга, спортивнай саалаларга уонна да атын спорт көрүҥнэрин кытта бииргэ үлэлиэхтэрин сөп. Бары усулуобуйаны толорор түбэлтэлэригэр саҥа федерация судаарыстыбаттан үп-харчы өттүнэн өйөбүлү ылыаҕа.
Министиэристибэҕэ өйүүргэ быһаарыы ылылынна уонна маҥнай энтузиаст дьоҥҥо мас-реслтлины тарҕатыыга, пропагандалааһыҥҥа көмө оҥоһуллуоҕа. Ону тэҥэ аан дойдутааҕы турнирдарга, ол иһигэр мас-рестлиҥҥэ аан дойду чемпионаттарыгар кыттарга Ангола сүүмэрдэммит хамаандатыгар киириэхтээх спортсменнары эрчийэргэ, бэлэмнииргэ миэстэ бэриллиэҕэ.
Аан дойдутааҕы мас-рестлинг федерациятын салалтата 2017 сыллаахха омук устудьуоннарын ортолоругар үлэни ыытан барбыта. Кинилэр кэлин аан дойду чемпионаттарыгар кыттарга көҥүлү ылбыттара, бириистээх миэстэлэргэ тиксибиттэрэ. Идэни ылан, дьиэлэригэр төнүннэхтэринэ, кинилэр мас-рестлинг амбасадордара буолаллар.
Оннук конголезец Жарни Варнель Кимпеди буолла, кини Конго Өрөспүүбүлүкэтин мас-рестлинг Федерациятын салайбыта. Египет устудьуоннара Ибрагим Мохамед уонна Ахмед Мохаммед быйыл «Фараон Кубогын» ыытыыны көҕүлээбиттэрэ.
