Мадьыны ыһыаҕын кэмигэр, ыам ыйын 31 — бэс ыйын 1 күннэригэр, мас-рестлинҥа норуоттар ардыларынааҕы турнир буолуоҕа. Помостка монгол спортсменнара тахсыахтара.
Өрөспүүбүлүкэ күүстээх мадьынылара кыттыы ылылаллар, 13 ыйааһыҥҥа дьахталларга уонна эр дьоҥҥо бастыҥнары быһаарыахтара.
«Амма улууһун дьаһалтата 100 м сүүрүүгэ эр дьоҥҥо уонна дьахталларга кыайыылаахтарга анал бириис туттарар. Дьахталлар халадаайдаах сүүрэллэр», — ЯСИА-ҕа мас-рестлинг федерацията эттэ.
Таас таһыытыгар күрэхтэһиэхтэрэ. Былырыыҥҥыттан дьахталлар эмиэ киирсэллэр. Кыайыылаах кэрэ аҥар аан дойду чемпиона Сергей Константиновтан уонна Манчаары оонньууларын кыайыылааҕа Айсена Атастыроваттан анал бириис тутуоҕа. Эр дьону аан дойду түөрт төгүллээх кыайыылааҕа, мас-рестлиҥҥа Россия спордун үтүөлээх маастара Дмитрий Попов наҕараадалыаҕа.
Ньирэй бириистэри федерация эр дьоҥҥо уонна дьахталларага саамай мааны сахалыы таҥастаахтарга биэриэҕэ.
Түмүккэ, алта күрэхтэһии кыайыылаахтара сэрэбиэй тардыахтара. Саамай бааттаах — саха быһаҕын тутуоҕа. Бирииһи Манчаары оонньууларын чемпиона Николай Барашков туруорар.
