Ил Дархан Айсен Николаев «Россия24» ханаалга «Быһа кэпсэтии» биэриигэ тохсунньу 22 күнүгэр Амма улууһугар барарын туһунан кэпсээтэ. Бу күн сүрүн түгэнинэн саҥа таас поликлиника аһыллыыта буолуоҕа, суруйда Саха сирэ саайт.
«Төрөөбүт күммэр мин өрүү элбэх дьарыктаах буолабын, үгүстүк улуустарга сылдьабын. Бу сырыыга Амма улууһугар барыам, онно улахан тэрээһиннээхпит – киин балыыһаҕа саҥа поликлиника дьиэтин аһыллыыта буолар. Бу бэртээхэй дьиэ национальнай бырайыагынан тутуллубута. Хаартыскалары уонна видеолары көрдүм – дьэ, бэртээхэй эбийиэк эбит. Бу үөрүүнү улуус олохтоохторун кытта үөрэ-көтө үллэстэбин. Тэрээһиннэр эмиэ былааннаммыттар, ону хайаан да ыытыахпыт. Мин санаабар, төрөөбүт күммэр саамай үчүгэйэ диэн, үлэ элбэх, маннык тэрээһиннэр элбэх буоллахтарына, ол миигин дьолунан толорор уонна үлэбит мээнэҕэ буолбатах диэн биллэрэр», — диэн Айсен Николаев үллэһиннэ.
Санатан эттэххэ, Амма улууһугар доруобуйа харыстабылын саҥа эбийиэгэ Арассыыйа бэрэсидьиэнэ Владимир Путин сорудаҕынан олоххо киирбит «Уһун уонна көхтөөх олох» национальнай бырайыак чэрчитинэн уонна доруобуйа харыстабылын систиэмэтин сайыннарыыга Ил Дархан ыйааҕынан тутулунна.
Сиһилии: https://www.sakha.gov.ru/news/18769
