Саха сиригэр алтынньы 1 күнүгэр нэһилиэньэни иһитиннэрэр систиэмэни биир кэлим бэрэбиэркэлиэхтэрэ. «Барыгытыгар болҕомто!» электросиреналары уонна улаханнык саҥарар тэриллэр нөҥүө биллэрии биэриэхтэрэ. Ону тэҥэ телевидение уонна араадьыйа биэриилэрэ тохтуоҕа.
“Холкутук сылдьаргытыгар, аймахтаргытыгар, чугас дьоҥҥутугар сэрэтэргитигэр көрдөһөбүт. Санатар буоллахха, дорҕоон сигналын истэн, телеканаллар эфирдэригэр иһитиннэриилэри көрүөххүтүн эбэтэр араадьыйанан истиэххитин сөп. Дорҕоон сигналларын биэрии уонна телеэфиры солбуйуу былааннаах үлэ“, — диэн Саха Сирин гражданскай оборуонаҕа министиэристибэҕэ сэрэттилэр.
Биллэрии тиһиктэрэ айылҕа уонна техногеннай характердаах ыксаллаах быһыы-майгы үөскүүр түбэлтэтигэр дьоҥҥо иһитиннэрэр сыаллаах ыытыллар.
