Аллараа Бытантай олохтооҕо, үлэ уонна тыыл бэтэрээнэ, улахан дьиэ кэргэн иһирэх ийэтэ, хос-хос эбэ Горохова Любовь Ивановна 90 сааһын туолла.
Аллараа Бытантай нэһилиэгин олохтооҕо, 90-с хаарын үктээбит ытык-мааны Любовь Ивановна Горохова олох-дьаһах хаамыытын хаһыаты ааҕан, телевизоры көрөн билэ олорор.
«90 саас эттэххэ дөбөҥ. Бу орто дойдуга киһи төрөөн-үөскээн, олох олорон, тахсыыны-түһүүнү барытын эт хаанынан билэн, тулуйан, үөрүү-көтүү аргыстаах олороро дьол буоллаҕа. Эҕэрдэлии тиийэрбитигэр биһиги ытык-мааны кырдьаҕаспыт тапталлаах «Бытантай уоттара» хаһыатын туппутунан олороро. Барытын билэ-көрө олоробун, хат хат ааҕабын», — диэн сэһэргии көрсүбүтүн уопсастыбаннай кэрэспэдьиэн Тамара Шадрина кэпсиир.
Олохтоох дьаһалта баһылыга Константин Старостин, баһылык солбуйааччыта Надежда Старостина, социальнай үлэһит Тамара Шадрина ытык кырдьаҕаһы дьоһун түгэнинэн эҕэрдэлээтилэр.
«Эн бэйэҥ күүскүн, өйгүн-санааҕын ууран, дьонум-сэргэм туһа диэн колхуос, сопхуос күүрэннээх кэмнэригэр үтүө суобастаахтык үлэлээбит үтүөлэриҥ иһин барҕа махталбытын тиэрдэбит! Баҕарабыт эйиэхэ, ытык мааны кырдьаҕаспытыгар чэгиэн доруобуйаны, үгүс үөрүүлээх, дьоллоох-соргулаах уһун үйэни, нус-хас байылыат олоҕу, этэҥҥэ буолууну!», — диэн эҕэрдэлээтилэр.
Ааптар: «Бытантай уоттара» хаһыат
This post was published on 01.11.2019 11:13 11:13