Быйыл балаҕан ыйын 8-9-10 күннэригэр бүтүн өрөспүүбүлүкэ үрдүнэн бэлитиичэскэй суолталаах тэрээһиннэр ыытыллаары тураллар. Саха Өрөспүүбүлүкэтин Ил Дарханын, Ил Түмэн дьокутааттарын итиэннэ улууспутугар баһылыгы талыахпыт, диэн Уус Алдан улууһун дьаһалататын пресс-сулууспата суруйар.
Быйылгы быыбар уратыта — урукку курдук, биир күн быыбардаабакка, үс күн устата талбыт хандьыдааппытыгар куоласпытын биэриэхпит.
Уус Алдан улууһугар баһылык дуоһунаһыгар 1-кы №-дээх хандьыдаатынан үлэлии олорор баһылык Алексей Федотов “Биир ньыгыл Арассыыйа” бэлитиичэскэй баартыйаттан регистрацияланна.
Дастабырыанньаны Уус Алданнааҕы быыбардыыр хамыыһыйа бэрэссэдээтэлин солбуйаааччы Августина Васильева үөрүүлээх быһыыга-майгыга туттарда.
Бу күн Алексей Федотовтыын биир ситимнээхтик үлэлээбит уопсастыбанньыктар, тэрилтэ салайааччылара, үлэһиттэрэ мустан хандьыдаакка ситиһиилэри баҕардылар.
Наталья Попова
