Саха сирин парламенын XVII пленарнай мунньаҕар 36 боппуруос көрүлүннэ, ол быыһыгар бастакы уонна иккис ааҕыыларга уураах бырайыактара, ону тэҥэ ИДЬМ үлэтигэр уонна тыа хаһаайыстыбатын сайыннарыыга судаарыстыбаннай бырагыраамаҕа улахан суолталаах боппуруостар көрүлүннүлэр. Бу туһунан Ил Түмэн бэрэссэдээтэлэ Алексей Еремеев иһитиннэрдэ, — диэн ЯСИА суруйда.
«Ис дьыала министиэристибэтин 2025 сыллааҕы үлэтин түмүгүнэн олус суолталаах боппуруоһу көрдүбүт. Уопсайынан, норуот депутаттара ИДЬМ үчүгэйдик ыытыллыбыт үлэтин бэлиэтииллэр. Саха сиригэр буруйу оҥоруу таһыма аччыыр, ити эрээри официальнай статистиканан улаатыы көстөр, ити наркотиктарынан буруйу оҥоруу хас биирдии эпизода туспа регистрацияланар буолбутуттан тахсыбыт. Урут оннук практика суох этэ», — диэтэ спикер Ил Тумэн.
Ил Түмэн бэрэссэдээтэлэ кибербуруйдар, саастарын ситэ илик оҕолор ортолоругар сокуону кэһиилэр уонна рецидивтар эйгэлэригэр көрдөрүүлэр намтаабыттарын бэлиэтээтэ.
«Уопсайынан, ИДЬМ үлэтинэн үчүгэй динамиканы бэлиэтиибит эрээри, манна 800-тэн тахса вакантнай миэстэ баара, кадрынан хааччыллыы боппуруоһа күүскэ турарын бэлиэтиир. Биллэн турар, маны бары бииргэ толкуйдуохпутун наада», — диэн Алексей Еремеев тоһоҕолоон бэлиэтээтэ.
Итини сэргэ бырабыыталыстыба чааһыгар тыа хаһаайыстыбатын сайыннарыыга судаарыстыбаннай бырагырааманы үбүлээһин боппуруоһа көрүлүннэ: «Бүгүн парламеҥҥа бу бырабыыталыстыба чааһын түмүгүнэн бырагыраама кыччаабатын туһугар бырабыыталыстыба чилиэннэрин кытта дуогабардастыбыт. Бырагыраама парламент ураты хонтуруолугар сылдьыаҕа», — диэн Еремеев түмүктээтэ.
