Үс төгүллээх олимпийскай чемпион, 20-с үйэ бастыҥ тустууга Александр Карелин Дьокуускайга кэллэ. Кини саҥа спортивнай саала арыллыытыгар кыттыа, салалтаны кытта көрсүө уонна эдэр бөҕөстөргө маастар-кылаас көрдөрүө.
«Мин манна кэлбит сыалым — бөҕөстөр түмсүүлээхтэрин көрдөрүү, тоҕо диэтэххэ мин тустуу сайдыбыт уонна дириҥ үгэстэрдээх өрөспүүбүлүкэҕэ кэллим. Саха сирин кытта миигин тустуу, Роман Дмитриев, Павел Пинигин, уонна, биллэн турар, Иван Ярыгин, сибээстииллэр. Чуолаан аан бастаан кинилэртэн мин бу дойду кэрэтин туһунан истибитим. Мин манна урут сайыҥҥы уонна кыһыҥҥы кэмнэргэ сылдьыбытым, көҥүл тустууга Россия чемпионатыгар. Мин сырыым кэнниттэн тренердэргэ үчүгэй суол хаалыан баҕарабын. Бырабыыталыстыба тустууну өйүүр, тустууну манна олохтоох дьон сөбүлүүр, онон греко-римскай тустуу онно эбии буоларыгар эрэллээхпин. Ыччакка саҥа кэрчиктэри, ньымалары көрдөрүөм. Тренердэр туох баар кыаҕы туһаннахтарына, оҕолор ситиһиилэрэ өссө үрдүө, Россия сүүмэрдэммит хамаандатыгар миэстэ ылыахтарын сөп», — СИА-ҕа Александр Карелин санаатын эттэ.
Кинини кытта Дьокуускайга аан дойду икки төгүллээх чемпиона уонна греко-римскай тустууга Европа чемпиона Александр Игнатенко, Новосибирскай уобалас спортивнай тустууга Федерациятын президенэ Сергей Сёмка, вице-президенэ Юрий Токарев, директорэ Евгений Яхимович, «Карелин-Фонд» салалтата Юрий Середа, Олег Дозорцев, Олег Войтюк, Константин Круглянский кэллилэр.
