Алдан киин балыыһатын инфекционнай балыыһатыгар 11 пациент сытар: биэһэ коронавируска ыалдьыбыттара бигэргэммит, алта кэтээн көрүүгэ. Бу туһунан олохтоох кылаабынай быраас Дмитрий Сергин эттэ.
Муус устар 13 күнүн сарсыардааҥы туругунан Алданнааҕы инфекционнай балыыһаҕа коронавируска ыалдьыбыттара чуокайдаммыт биэс киһи сытар, эмтэниини ааһаллар. Алта пациент анаалыстарын түмүгүн кэтэһэллэр.
«Бэҕэһээ Дьокуускайтан исписэлиистэр көмөҕө кэлбиттэрэ. Эмтээһини хайдах ыытарбытыгар консультацияны биэрэллэр«, — диэтэ Дмитрий Сергин.
Кини эппитинэн, балыыһаҕа сотору кэминэн харыстанар көстүүмнэр уонна мааскалар медперсоналга анаан кэлиэхтэрэ. Билигин балыыһаҕа аҕалыллыбыт биэс ИВЛ апаараата туруоруллар.
Кылаабынай быраас олохтоохтору «самоизоляция эрэһиимин» тутуһалларыгар ыҥырар.
