23 От ыйа 23.07
  • 28°
  • $ 87,78
  • 95,76

Айсен Николаев Владимир Путины кытары көрсүһүүтүгэр оскуола кыһалҕатын боппуруоһун туруорда  

13:17, 30 августа 2018
Текст:
Читайте нас на
Яндекс Новости
ЯДВ
Бүгүн Ил Дархан э.т. Айсен Николаев Москваҕа Ново-Огаревоҕа РФ бэрэсидьиэнэ Владимир Путины кытары көрүстэ. Айсен Сергеевич Саха сирэ саҥа үөрэх дьылыгар бэлэмин иһитиннэрдэ.

Владимир Путин көрсүһүү иннинэ өрөспүүбүлүкэ үөрэх дьылыгар төһө бэлэмин ыйыталаста. Айсен Николаев бэлиэтииринэн, өрөспүүбүлүкэ оскуолалара бары кэриэтэ балаҕан ыйын 1 күнүттэн үлэлииргэ бэлэмнэр. Үөрэхтээһиҥҥэ биир кыһалҕа баар, ол – сылтан сыл үөрэнээччи ахсаана элбии турар, үөрэнэр миэстэ тиийбэт. “Билигин биһиги биир кыһалҕалаахпыт: оҕо ахсаана элбээбитинэн, үөрэнэр миэстэбит тиийбэт. Холобур, биэс сыллааҕыта Дьокуускай куоракка 32 тыһыынчаттан тахса үөрэнээччи баар буоллаҕына, билигин 42 тыһыынчаҕа тиийдэ. Биэс сыл иһигэр 10 тыһыынчанан эбилиннэ”, — диэн бэлиэтиир Айсен Сергеевич.
Манна даҕатан кини 2015 с. саҕалаан судаарыстыба уонна чааһынайдар бииргэ үлэлээһиннэрин ньыматынан киин куоракка 12 социальнай эбийиэк тутуллубутун, ол иһигэр 4 оскуола, 5 оҕо саада, 3 култуура эбийиэгэ (аныгы искусства дьиэтэ, куорат библиотекатын киинэ, оҕо искусствотын дыбарыаһа) былааннаммыттарын эттэ. Бу эбийиэктэр бары быйыл уонна эһиил үлэҕэ киириэхтээхтэр. Үөрэхтээһин салаатыгар 1620 саҥа үөрэх миэстэтэ арыллыахтаах. Ол эрээри билигин куорат оскуолаларыгар 43-түү оҕо үөрэнэр кыһалҕатын быһаарбат.
“Ол иһин биһиги билигин атын ньыманы тобулан эрэбит. Куоракка оскуола буолуон сөптөөх тутуулар бааллар. Ону өрөмүөннээн өссө тыһыынча кэриҥэ үөрэх миэстэтин таһаарыахха сөп. Ол эрээри өрөспүүбүлүкэ бүддьүөтүн дефицита быйыл улахан. Эбийиэктэри оскуолаҕа анаан оҥорууга 600 мөл. солк. наада. РФ бырабыыталыстыбата манна, кыаллар буоллаҕына, көмөлөһөрө буоллар”, — диэн иһитиннэрэр Айсен Николаев Владимир Владимировичка.
Онуоха Владимир Путин: “Бырабыыталыстыба ханнык эмит эбии үбүлээһин усулуобуйатын көрүө”, — диэн хоруйдуур. Айсен Николаев эбии үбүлээһиҥҥэ өрөспүүбүлүкэ бэлэмин туһунан иһитиннэрдэ. Владимир Путин түмүккэ бырабыыталыстыбаҕа дьаһал биэриэҕин туһунан эттэ.

Аграфена КУЗЬМИНА, “Саха сирэ” хаһыат.

Следите за самым важным и интересным в Telegram-канале и WhatsApp-группе ЯСИА