Ааһан эрэр ыйга Саха сирин биир сүрүн событията – Ил-114-300 диэн саҥа дойдуга оҥоһуллубут турбовинтнай сөмүлүөтү боруобалааһын буолла. Экспериментальнай көтүүлэртэн биирдэстэригэр Саха сирин баһылыга эмиэ быһаччы кыттыыны ылла.
Бүгүн, олунньу 26 күнүгэр, “Якутия, вперед!” биэриигэ Айсен Николаев Ил-114-300 бэртээхэй дойду сөмүлүөтэ буоларын, Саха сиригэр өр күүппүппүтүн эттэ.
«Биллэн турар, Ил-114-300 — кэтэһиилээх сөмөлүөт. Биһиги кинини, чуолаан, дойдубутугар таҥыллан оҥоһуллубутунан күүтэбит. 2019 сылтан саҕалаан, Россия президенэ Владимир Путинтан федеральнай министиэристибэ үлэтин түргэтэтэргэ сорудах биэрэригэр көрдөспүтүм, бу лайнер төһө кыалларынан түргэнник биһиэхэ кэлэригэр. Билигин дойду бырабыыталыстыбата уонна биһиги авиатутааччыларбыт улахан үлэлэринэн толору дойдуга оҥоһуллубут Ил-114-300 сөмүлүөтэ халлааҥҥа таҕыста.
Экспериментальнай көтүүлэртэн биирдэстэригэр кыттыбытым — бэйэм өйдүөхпүн наада эбээт, биһиги авиапромышленноспыт хайдах салгын судноларын биһиэхэ биэрэрин. Сөмөлүөт — олус үчүгэй. Биллэн турар, Ан-24-тэн тупсаҕай, тугугнан эрэ Сухой Суперджеты санатар.
Көтүү кэнниттэн биһиги авиатордарбытын кытта Саха сиригэр Ил-114-300 эксплуатациятын уратыларын учуоттуурга оҥорооччуларга этии киллэрбиппит. Холобур, багаж уурар миэстэ кээмэйин улаатыннарар туһунан этилиннэ, манна пассажирдар миэстэлэрин аҕыйатыахха сөп. Саха сиригэр 50-52 пассажиры ылар сөмөлүөт сөптөөх диэн этиигэ бары сөбүлэһэбит.
Экономическай көрдөрүүлэринэн самолет эмиэ олус үчүгэй, оннооҕор импортан ордук. Билиҥҥи туругунан, Ил-114-300 сайыҥҥы кэмҥэ сиринэн көтөр-түһэр балаһаларга олордорго билиҥҥитэ сертификатын ыла илик. Манан сибээстээн, конструкцияҕа тустаах уларыйыылар киириэхтэрэ. 2027 сылга бу сертификация ааһара сабаҕаланар, оттон 2028 сылга суудуна Саха сиригэр эксплуатация усулуобуйатыгар толору эппиэттиэҕэ, ол иһигэр буор ВПП-лар түһүүлэрин киллэрэн туран», — диэн Айсен Николаев кэпсээтэ.
Саха сирин баһылыга быйылгыттан бастакы Ил-114-300 сөмүлүөттэр Россия авиахампаанньаларыгар киирэн баралларын иһитиннэрдэ. Кини саҥа лайнер Саха сирин халлааныгар эргэрбит Ан-24 суднолары солбуйарга сөбүн бэлиэтээтэ.
“Сөмөлүөт чэпчэкитэ суох уонна сыанатынан импорт анал аналогтарын кытта тэҥнэһэр буолан, Ил-114-300 Арассыыйа авиахампаанньаларыгар, ол иһигэр Саха авиахампаанньаларыгар табыгастаах буоларыгар федеральнай өйөбүл дьаһаллара наада дии саныыбын», — диэн Саха сирин баһылыга түмүктээтэ.
