Бэҕэһээ, балаҕан ыйын 18 күнүгэр, Ил Дархан Айсен Николаев национальнай бырайыактар уонна СӨ судаарыстыбаннай бырагыраамаларын чэрчилэринэн олоххо киллэриллэр эбийиэктэри сүрүннээһиҥҥэ, саҥардан оҥорууга суһал ыстаап көһө сылдьар мунньаҕын ыытта. Доруобуйа харыстабылын сүрүн тутууларын хаамыытын туһунан боппуруостар көрүлүннүлэр.
Дьокуускай куоракка өрөспүүбүлүкэтээҕи кардиологическай диспансер иккис уочарата — 150 куойкаҕа кардиососудистай (сүрэх-тымыр ыарыыларын эмтиир) киин уонна радиологическай отделениелаах, хаһаайыстыбаннай блоктаах, 210 куойкалаах өрөспүүбүлүкэтээҕи онкологическай диспансер тутуллаллар. Айсен Николаев кардиососудистай киини тутан киллэрии ураты хонтуруолга тутулларын бэлиэтиир. Бу тутуу бигэргэтиллибит болдьоҕор үлэҕэ киллэриллиэхтээҕэ бэлиэтэннэ. Билиҥҥи кэмҥэ дьиэ ис уонна тас өртүн ситэрэр-хоторор үлэлэр ыытыллаллар. Онкологическай диспансеры тутуу үлэтэ тэтимнээхтик салҕанар. Ил Дархан кардиологическай киини уонна онкологическай диспансеры тутуу үлэтэ кыраапык быһыытынан баран иһэллэр диэн сыаналаата.
Мунньахха эбийиэктэргэ суһал быһаарыылары ирдиир боппуруостар дьүүллэһилиннилэр. Улахан болҕомто киирэр подъезтары, массыына турар сирдэрин, сирдэрин-уоттарын тупсаран оҥорууну кэмигэр ситэрэргэ уурулунна.
Дьокуускайга 245 куойкалаах өрөспүүбүлүкэтээҕи килиниичэскэй инфекционнай балыыһаны бырайыактааһын туһунан иһитиннэрии оҥоһулунна. Билиҥҥи кэмҥэ бырайыактыыр-сметнай документация судаарыстыбаннай эспэртиисэни ааһар. Айсен Николаев инфекционнай ыарыылар киэҥник тарҕаныыларынан сибээстээн, бириэмэ ирдэбилинэн, бу эбийиэги тутуу уһулуччу суолталааҕын бэлиэтээтэ.
Түөрт оройуоҥҥа доруобуйа харыстабылын эбийиэктэрин бырайыактааһын уонна тутуу боппуруостара көрүлүннүлэр. Бу Уус Маайа оройуонугар Уус Маайа бөһүөлэгэр симиэнэҕэ 104 киһи доруобуйатын көрдөрүнэр поликлиникалаах 45 куойкалаах балыыһа комплекса, Таатта улууһугар Ытык Күөлгэ симиэнэҕэ 200 киһи сылдьан көрдөрүнэр поликлиниката, Чурапчыга балыыһа комплекса, Муома оройуонугар Хонуу сэлиэнньэтигэр симиэнэҕэ 104 киһи көрдөрүнэр поликлиникалаах 22 куойка миэстэлээх балыыһа комплекса. Бу эбийиэктэри олоххо киллэрии РФ Бэрэсидьиэнэ Владимир Путин сорудаҕынан дойдуга доруобуйа харыстабылын бастакы сүһүөх звенотун саҥардыы бырагырааматын иитинэн ыытыллар.
Мэдиссиинэ анал тэриллэрин уонна тутуу матырыйаалларын сыаналара ыараабыттарынан сибээстээн, бу эбийиэктэргэ симиэтэлэрэ үрдүүрэ сабаҕаланар. Маныаха дойду атын эрэгийиэннэригэр эмиэ маннык тенденция бэлиэтэнэр. Ил Дархан СӨ Бырабыыталыстыбатыгар компактнай, дьоҕус балыыһалары оҥорон таһаарыы халыыбын үөрэтэн көрөргө соруйда. Мунньах түмүгүнэн боротокуол толоруллар.
Андрей Сорокин (СИА) хаартыскаҕа түһэриитэ
Источник: © edersaas.ru саайт
