Кыргыстаантан тустар саха бөҕөһө Айаал Лазарев аан дойду Кубогар боруонса мэтээли ылары ситистэ.
Айаалы үрдүк ситиһиитинэн өрөспүүбүлүкэ баһылыга Айсен Николаев бэйэтин Инстаграм сирэйин нөҥүө эҕэрдэлээтэ.
«Айаал Лазарев ыарахан ыйааһыҥҥа сахалартан бастакынан үрдүк көрдөрүүнү ситистэ. Киниэхэ саҥа чаҕылхай кыайыылары, ситиһиилэри баҕарабын», — диэбит Ил Дархан.
Айаал Лазарев аан дойду Кубогар барыта түөртэ туһунна. Онтон уһугэр хотто. Боруонса мэтээли ылар иһин киирсиигэ Айаал Лазарев аан дойду чөмпүйэнээттэрин үрүҥ көмүс, боруонса призердарын, Европа чөмпүйэнээттэрин биэс төгүллээх медалиһын Азербайджан тустуугун Джамаладдин Магомедовы кытары көрсөн, 11:0 ахсаанынан итэҕэтиилээхтик хотто.
Бастакы киирсиилэригэр Айаал Канада бөҕөһүн Амару Десины 6:0 ахсаанынан, Молдоваттан Егор Олары тушенан кыайталаабыта. Полуфиналга Польша тустуугар Роберт Бараҥҥа 0:6 ахсаанынан хотторбута.
This post was published on 18.12.2020 13:01 13:01