Бүгүн Уус Алдан улууһун дьаһалтатын дьиэтигэр Кыайыы знамятын көтөҕөр үөрүүлээх тэрээһин буолла. Кыайыы знамятын дойдубут былаахтарын кытта тэҥҥэ күөрэччи тутан, Мүрү 2-с №-дээх орто оскуолатын байыаннай-патриотическай кулуубун иитиллээччилэрэ түһүлгэҕэ киллэрдилэр.
Улуу Кыайыы 79-с сылын көрсө эҕэрдэ тылы улуус баһылыгын солбуйааччы Анатолий Сторожев этэн туран, ыар сүтүктээх Аҕа дойду сэриитигэр кыайыыны турууласпыт дьоммут кэриэстэригэр иһийэн ылыыны биллэрдэ.
Эҕэрдэ тылы улуус депутаттарын сэбиэтин бэрэссэдээтэлэ Иннокентий Аммосов, тыылга кыайыыны уһансыбыт, ытык саастаах Мария Фомина, махталлаах эдэр көлүөнэ аатыттан улуус дьаһалтатын ыччат уонна дьиэ кэргэн салаатын салайаааччыта Айаал Степанов эттэ.
Байыаннай дьайыы кыттыылааҕа «Эр санааланыы» уордьан кавалера Георгий Прокопьев эҕэрдэ тылы этэн туран, улуус дьонугар-сэргэтигэр байыаннай дьайыы кыттыылаахтарыгар көмө иһин махтал тылын эттэ.
Кытыаста кытарбыт Улуу Кыайыы ытык бэлиэтин Кыайыы знамятын байыаннай кулууп оҕолоро уонна Айаал Степанов күөрэччи көтөҕөн көй салгыҥҥа күөрэттилэр, суруйда Мария Аргунова, мюрюгазета.рф
This post was published on 06.05.2024 16:01 16:01