Саха Өрөспүүбүлүкэтигэр «Россия – страна возможностей» бэрэсэдьиэн платформатын «Абилимпикс» региональнай чемпионата саҕаланна диэн СИА иһитиннэрэр. Чемпионакка 260 киһи 31 хайысханан кыттыаҕа: массыынаны өрөмүөннээһин уонна хааччыйыы, сетевой администрирование, прикладной эстетика, кондитерскай дьыала, поварскай дьыала, медицинскэй социальнай көрүү, флористика, экономика уонна бухгалтерскай учуот уо. д. а.
Күрэхтэһиигэ инбэлиит дьон кыттыахтара, ол иһигэр 14 саастарыттан үөһээ саастаах 115 үөрэнээччи, 119 устудьуон уонна 26 исписэлиис. Кыттааччылар ахсааннарыгар – 13 хампаанньа/тэрилтэ үлэһиттэрэ, ол иһигэр ГАУ СӨ «1 №- дээх Поликлиника», СӨ » М. Е. Николаев аатынан Медицина национальнай киинэ – 1 №- дээх РБ», СӨ ГБУ «Дьокуускайдааҕы клиническай балыыһа, «Инбэлииттэр профессиональнай уонна медико-социальнай реабилитацияларын өрөспүүбүлүкэтээҕи техникум-интерната,«Салгын» көрбөт дьон массаастыыр салона уо. д. а.
«Абилимпикс» хамсааһын-инбэлииттээх дьоҥҥо карьернай трамплин эрэ буолбатах, маны таһынан бу дьон уопсасыбаҕа дьоһун миэстэни ылалларыгар, бэйэ кыаҕын сайыннаралларыгар көмөлөһөр. Маны сэргэ, чемпионат хас биирдии кыттааччытыгн үлэтин сыаналааһын биһиги дойдубутугар инклюзивнай уопсастыба салгыы сайдарыгар улахан суолталаах», – диэн «Абилимпикс» национальнай киин салайааччыта Дина Макеева эттэ.
Күрэхтэһии чэрчитинэн кыттааччылар бэйэлэрин профессиональнай маастарыстыбаларын уонна үөрүйэхтэрин экспертэргэ көрдөрүөхтэрэ. Быйыл компетенция испииһэгэр саҥа хайысхалар киирдилэр: ногтевой сервис, испииссэнэн баайыы, флористика уонна столярнай дьыала.
«Саха сиригэр «Абилимпикс» бастакы региональнай чемпионат 2016 с. буолбута. Аан бастаан саҕаланарыгар икки хайысханан уонча кыттааччы күрэхтэспитэ. Онтон ыла улахан хамсааһын таҕыста, билигин тэрээһин доруобуйаларыгар хааччахтаах дьон үлэ булунар, бэйэлэрин кыахтарын көрдөрөр былассааккаларынан буолла. Үөрэх системата хас биирдии оҕоҕо бэйэтин дьоҕурун олоххо киллэрэр усулуобуйатын үөскэтэр. Оҕолор бэйэлэрин холобурдарыгар киһи сатаабатаҕа, кыайбатаҕа суоҕун көрдөрөллөр ,- диэн Саха Өрөспүүбүлүкэтин үөрэҕин уонна наукатын миниистирин бастакы солбуйааччы Алевтина Аргунова бэлиэтээтэ.
