Саха сиригэр сыл саҕаланыаҕыттан анал байыаннай дьайыы 32 кыттыылааҕа уонна байыаннай сулууспалаахтар дьиэ кэргэттэрин 15 чилиэнэ үлэҕэ киирдилэр. Бу туһунан кулун тутар 3 күнүгэр ыытыллыбыт брифиҥҥэ регион нэһилиэнньэни дьарыктаах буолууга судаарыстыбаннай кэмитиэтин бэрэссэдээтэлин солбуйааччы Георгий Борисов иһитиннэрдэ.
«АБдь кыттыылаахтарын уонна кинилэр дьиэ кэргэттэрин чилиэннэрин үлэнэн хааччыйыы боппуруостарыгар дьарыктаах буолуу сулууспата ураты болҕомто ууруллар. Үлэ биэрээччилэри көҕүлээһин чэрчитинэн, анал байыаннай дьайыы кыттыылаахтарын, байыаннай сулууспаттан ууратыллыбыт, инбэлииттээх анал байыаннай дьайыы кыттыылаахтарын, үлэҕэ ылыы ороскуотун толуйууга субсидия бэриллэр, олохтоммут квотаҕа сөп түбэһиннэрэн», – диэн Георгий Борисов бэлиэтээтэ.
Кини этэринэн, квота чэрчитинэн үлэҕэ киирбит биир киһи субсидиятын кээмэйэ ортотунан 122 — тэн 135 тыһыынча солкуобайга тиийэр.
Дойду президенэ Владимир Путин көҕүлээбит «Кадры» национальнай бырайыагын «Дьарыктаах буолууга көмөлөһөр көҕүлүүр миэрэлэр» федеральнай бырайыагын чэрчитинэн 1-кы уонна 2-с бөлөх инбэлииттэрин, инбэлииттээх бойобуой дьайыылар бэтэрээннэрин үлэҕэ киллэриигэ үлэ миэстэтин хааччыйар дьаһаллары олоххо киллэрии салҕанан барар. Субсидиялар оборудованиены атыылаһыыга, таҥыыга уонна туруорууга туһуланаллар. Оборудованиены атыылаһыыга субсидия кээмэйэ 200 тыһыынча солкуобайтан ордубат. Итини тэҥэ сорох категориялаах гражданнары, ол иһигэр АБДь-га кыттыыны ылбыт бойобуой дьайыылар бэтэрээннэрин, анал байыаннай дьайыы кэмигэр соруктары толорууга өлбүт дьон дьиэ кэргэттэрин чилиэннэрин наймылаһыыга судаарыстыбаннай өйөөһүн үлэтэ ыытыллар.
2026 сыллаахха өрөспүүбүлүкэа дьарыктаах буолууга сулууспатыгар 8 үлэ биэрээччиттэн 10 үлэ миэстэтигэр кыттарга сайабылыанньа киирбитэ. Бэриллибит хайысхалар түмүктэринэн 10 киһи, ол иһигэр АБДь-га кыттыбыт бойобуой дьайыылар 6 бэтэрээнэ үлэҕэ киирдилэр.
Быйыл олунньу 19 күнүгэр Саха сирин дьарыктаах буолуу бары кииннэригэр АБДь кыттыылаахтарын биир кэлим күннэрин чэрчитинэн «Бэйэ эргимтэтигэр» акция ыытылынна. Тэрээһиҥҥэ АБДь 162 кыттыылааҕа уонна кинилэр дьиэ кэргэттэрин 128 чилиэнэ кыттыыны ыллылар. Вакансияларын 80 үлэ биэрээччи билиһиннэрдэ. Акция түмүгүнэн 32 кыттааччы үлэҕэ киирии туһунан этиилэри ыллылар. Быйыл маннык акциялар эмиэ ыам ыйыгар, балаҕан ыйыгар уонна сэтинньигэ өрөспүүбүлүкэ бары улуустарыгар ыытыллыахтара.
