От ыйын 23 күнүгэр Өлүөнэтээҕи холбоһуктаах пароходство 2025 сылга Аартыкаҕа таһаҕаһы таһыы навигациятын сезонун официальнайдык аста, суруйда Саха парламент саайт.
Быйылгы навигация эмиэ урукку сылларга курдук – Саха Сирин ыраах улуустарыгар сүрүн суолталаах таһаҕаһы тиэрдии. Быйылгы навигацияҕа Өлүөнэтээҕи пароходство (гендириэктэр , Ил Түмэн дьокутаата С.А. Ларионов) бу хайысханан 370 тыһыынча туонна араас таһаҕаһы тиэрдэр сорук турар, ол иһигэр 170 тыһ. т убаҕас оттугу, 200 тыһ. т кытаанах таһаҕаһы.
Ыраах оройуоннарга таһаҕаһы тиэйиини хааччыйарга ордук улахан болҕомто муора учаастактарыгар үлэлиэхтээх суудуналары тиэхиньиичэскэй бэлэмнээһиҥҥэ уураллар. Онуохаҕа борокуоттар экипажтарын сүүмэрдээһин уонна суудуналары муоратааҕы эрэгиистир ирдэбиллэригэр сөп түбэһэр тиэхиньиичэскэй бэлэмнээһини ыытыы улахан оруолу ылар.
Бүгүҥҥү күн көрдөрүүтүнэн, норуот хаһаайыстыбатыгар билигин туттуллуохтаах табаары суудуналарга тиэйии үлэтэ саҕаланна. Ол курдук, Өлүөхүмэтээҕи бириистэҥҥэ 11,5 тыһ. т хочуолунайдарга туттуллар ньиэп оттуга тиэллиннэ, ол иһигэр 2,3 тыһ. өрөспүүбүлүкэ аартыкатааҕы улуустарыгар тиэрдиллиэхтээх. Ону тэҥэ, Бүлүү улуууһун Кыһыл Сыыр бөһүөлэгиттэн гаас конденсатын оттуга Кэбээйи улууһун киинигэр Сангаарга депонацияҕа тиэрдилиннэ. Мантан танкердарга тиэйэн, салгыы Анаабыр уонна Өлөөн өрүстэринэн ыытыахтара. Билигин Иркутскай уобалас Осетровотыгар уонна Томпо улууһун Дьабарыкы Хайатыгар таас чоҕу суудуналарга тиэйии уонна хоту улуустарга тиэйии салҕанар.
Аллараа Бэстээххэ баар өрүс терминалыгар “Капитан Орлов” теплоходка таһаҕаһы тиэйиини түмүктээтилэр, “Ленанефть — 2030” теплоход сардык ньиэп бородууктатын тиэйиини кэтэһэн турар. Муоранан таһаҕаһы тиэйии былаанынан аныгылыы оҥоһуулаах “Сибирский” уонна “Ленанефть” сиэрийэлээх суудуналарынан 100 тыһ. т ньиэп бородууктата, 27 тыһ. т. кытаанах таһаҕас Дьааҥы, Халыма өрүстэр төрдүлэригэр тиэрдиллиэҕэ.
Өлүөнэтээҕи пароходство флота Өлүөнэ өрүһүнэн иһэр өрүс-муора кылаастаах суудуналары Дьааҥы, Индигиир, Халыма өрүстэргэ көрсөргө бэлэмнэнэр.
ххх
От ыйын 10 күнүгэр Эдьигээн улууһун ОДьКХ анаан Сангаартан таас чоҕу тиэммит 4 бааржа кэллэ. Бу күннэргэ, төһө да тохтообот ардах мэһэйдээтэр, чоҕу сүөкээһин күргүөмнээхтик бара турар. Ол курдук, 2,5 тыһ. т чох улуус кииниттэн 90 км. аллараа сытар Кыстатыамнааҕы учаастакка тиэрдилиннэ. Эдьигээҥҥэ бэйэтигэр 9,2 тыһ. т кэллэ диэн “СӨ ОДьКХ” СУТ Эдьигээннээөи филиалын дириэктэрин э.т. Петр Иванов биллэрэр.
ххх
“Халыматааҕы суудуна хампаанньата” АУо таһаҕаһы тиэйиигэ салаатын начаалынньыга Виктор Пискунов билиһиннэрбитинэн, хампаанньа борокуоттара Халыма өрүс араас учаастактарыгар үлэлииллэр, Аартыкатааҕы навигация саҕаланан бэлэмнэнии үлэтэ, түбүгэ элбээбит.
Бу күннэргэ Халыма бассейнын ойоҕос өрүстэригэр, Омолооҥҥо (Чукуоткаҕа) матырыйаалынай-тиэхиньиичэскэй таһаҕас тиэрдилиннэ, ол иһигэр Анюйскайга таас чох. От ыйын саҥатыгар Халыма өрүс баһыгар Сеймчан бөһүөлэгэр диэри хас да суудуна караванынан таһаҕаһы тиэртилэр. Бу таһаҕас Халыма эҥэр Магадаан уобалаһыгар уонна Чукуотка аптаныамынай уокуругар ананан кэллэ. Ону тэҥэ “Сахаэнерго” АУо, “Саханефтегазсбыт” АУо анаан ньиэп бородуукталара, СӨ ОДьКХ” СУТ учаастактарыгар таас чох тиэрдиллэллэр.
