Гражданскай уопсастыба сайдыытыгар көмөлөһөр коммерческайа суох тэрилтэлэр бырайыактарын өйүүргэ туһуламмыт Саха сирин баһылыгын граннарын куонкуруһун ыытыыга 2025 сылга 93 мөл тахса солк көрүллүбүт. Куонкуруһу ыччат дьыалатыгар уонна социальнай коммуникацияларга министиэристибэ биллэрбитэ. Бу туһунан www.sakha.gov.ru саайт иһитиннэрэр.
Саха сиригэр регистрацияламмыт коммерческайа суох тэрилтэлэр бары көрүҥнэрэ, үлэлэрин болдьоҕуттан тутулуга суох кыттыыны ылаллар. Ол ресурснай кииннэр, автономнай уонна уопсастыбаннай тэрилтэлэр, территориальнай уопсастыбаннай салайыныы уонна НКО атын көрүҥнэрэ буолуохтарын сөп.
«Өрөспүүбүлүкэ коммерческайа суох тэрилтэлэрэ социальнай көҕүлээһиннэри олоххо киллэриигэ мэлдьи эрэллээх партнердар. Граннар куонкурустара — кинилэр үлэлэрин спектрын кэҥэтэн, саамай кэскиллээх бырайыактары өйүүр кыахтаах», — диэн бэлиэтээтилэр Саха сирин ыччатын министиэристибэтигэр.
Сайаапкалары ылыы балаҕан ыйын 27 күнүттэн алтынньы 27 күнүгэр диэри 2025 с. ыытыллар. Сайаапкалары көрүү алтынньы 27-31 күннэригэр буолуоҕа, оттон бырайыактары сыаналааһын сэтинньи 1-10 күннэригэр ыытыллыаҕа.
“Куонкурус гражданскай уопсастыбаны сайыннарыыга уонна олохтоохтору социальнай соруктары быһаарыыга угуйууга көмөлөһөр саҥа идеялары, көҕүлээһиннэри көрдөрүөҕэ диэн эрэнэбит», – диэн министиэристибэҕэ тоһоҕолоон бэлиэтээтилэр.
Үбүлээһин 16 приоритетнай хайысханан бырайыактарга түҥэтиллиэҕэ. Олор ортолоругар култуура, искусство, спорт, доруобуйа харыстабыла, тулалыыр эйгэни харыстааһын, наука, үөрэх уонна да атын социальнай суолталаах эйгэлэр бааллар.
“Грант өйөбүлэ өрөспүүбүлүкэҕэ олох хаачыстыбатын тупсарыыга уонна көхтөөх гражданнары өйөөһүҥҥэ туһуламмыт көҕүлээһиннэри олоххо киллэрэргэ көмөлөһөр улахан суолталаах», – диэн биэдэмистибэҕэ эбэн эттилэр.
Куонкуруска аан бастаан сайаапканы биэрии «Электроннай бюджет» судаарыстыбаннай информационнай систиэмэ нөҥүө аадырыһынан ыытыллар. Сайаапкалары сигэнэн ылыналлар.
Конкурс туһунан сиһилии иһитиннэрии, сайаапканы оҥорууга ирдэбил, сыанабыл критерийдэрэ, приоритетнай хайысхалар испииһэктэрэ уонна эппиэттээх дьон сибээстэрэ ыччат дьыалаларыгар уонна социальнай коммуникацияларга министиэристибэтин официальнай саайтыгар бэчээттэннэ.
Министиэристибэ Саха сирин коммерческайа суох тэрилтэлэрин куонкуруска көхтөөхтүк кыттарга уонна социальнай бырайыактарын билиһиннэрэллэригэр ыҥырар.
“Чопчу НКО- лар ураты уонна ирдэниллэр көҕүлээһиннэри туруорсар кыахтаахтарын, оттон грант өйөбүлэ ону олоххо киллэриигэ дьоһун көмө буолуоҕар эрэллээхпит», — диэн түмүктээтилэр министиэристибэҕэ.
