Саха сирин баһылыга Айсен Николаев Россия Социальнай фондатын регионнааҕы салаатын салайааччыта Марина Германы кытта үлэ көрсүһүүтүн ыытта, өрүттэр социальнай эйгэ сүрүн боппуруостара көрдүлэр.
Кэпсэтии киин тиэмэтинэн социальнай төлөбүрдэри тэрийии буолла. Марина Герман быйылгы сылга Саха сирин олохтоохторун биэнсийэнэн хааччыйыыга 83 миллиард солкуобай кэриҥэ, оттон оҕолордоох ыаллары өйөөһүҥҥэ 27 миллиардтан тахса солкуобай туһуламмытын туһунан иһитиннэрдэ, систиэмэ көдьүүһүн тоһоҕолоон бэлиэтээтэ.
Анал байыаннай дьайыы кыттыылаахтарыгар уонна кинилэр дьиэ кэргэттэрин чилиэннэригэр көмө оҥорууга ураты болҕомто уурулунна. Сыл саҕаланыаҕыттан СВО бэтэрээннэрэ Россия Социальнай фондатын үбүнэн анал кииннэргэ реабилитацияланар уонна санаторнай-курортнай тэрилтэлэргэ эмтэнэр кыахтанна. Дьүүллэһии кэмигэр өрүттэр бу дьаһалы салгыы тупсарар, ол иһигэр айан ороскуотун толуйуу бэрээдэгин хаттаан көрүү туһунан кэпсэттилэр.
«Социальнай өйөбүлү күүһүрдэн, хас биирдии Саха сирин олохтооҕор өҥө хаачыстыбатын тупсаран иһиэхпит» — диэн Айсен Николаев бэлиэтээтэ.
