Балаҕан ыйын 18 күнүгэр, өрөспүүбүлүкэ судаарыстыбаннаһын күнүгэр — балаҕан ыйын 27 күнүгэр — былааннаммыт Айсен Николаевы кытта «Быһа линияҕа» боппуруостары хомуйуу саҕаланна. Бастакы күн Саха сирин олохтоохторуттан 72 боппуруос регистрацияланна, диэн регионы салайыы Киинэ иһитиннэрэр.
ЦУР иһитиннэриитинэн, 34 боппуруос колл-киин нөҥүө, онтон атын 38 боппуруос телеграм- бот нөҥүө киирбит. Үксүлэрэ Дьокуускайтан уонна Нерюнгритан кэлбиттэр. Саамай тарҕаммыт тиэмэлэринэн саахалланар дьиэлэртэн көһөрүү, эбийиэктэри тутуу, тупсарыы, дьиэ-уот, коммунальнай хаһаайыстыба уонна энергетика, доруобуйа харыстабылын уонна социальнай төлөбүрдэр буоллулар.
Саха сирин ЦУР салайааччыта Василий Десяткин колл-киин хайыы-үйэ 8 (4112) 506-006 нүөмэринэн үлэтин саҕалаабытын, 9 — 18 чааска ыйытыылары ылалларын иһитиннэрдэ. Ону тэҥэ кини ыйытыылары телеграм-бот нөҥүө биэриэххэ сөбүн, Россия мессенджера Макс нөҥүө ыйытыылары биэрэр кыах саҥа буоларын бэлиэтээтэ. Киирэр боппуруостар бары тута үлэҕэ ыытыллаллар, регионы салайар Киин кинилэри оҥорор оператор буолар.
Эфир балаҕан ыйын 27 күнүгэр олохтоох бириэмэнэн 19:00 чаастан саҕаланыа диэн санатыллар. Ил Дархан Саха сирин олохтоохторун ыйытыыларыгар үгэс курдук хоруйдуоҕа уонна регион сайдыытыгар саҥа соруктары кэпсиэҕэ.
Эфир биэриитэ «Нвк Саха», «Якутия 24», «Россия 24» телеханаалларга, ону тэҥэ «Тэтим», «Россия Радиота», «Виктория Саха», «СТВ-радио» араадьыйа ыстаансыйаларга уонна Айсен Николаев социальнай ситимнэригэр баар буолуоҕа.
Боппуруостары Саха Сирин ЦУР нөҥүө Telegram @voprosglaveyakutiii_bot чат-ботугар эбэтэр 8 (4112) 506-006 нүөмэринэн колл-кииҥҥэ ыытыахха сөп. Колл-киин үлэлиир кэмэ 09:00 чаастан 18:00 диэри.
Боппуруостары ылыы 2025 сыл балаҕан ыйын 27 күнүгэр диэри, «Быһа линия» түмүктэниэр диэри салҕаныаҕа.
Источник: sakha.gov.ru
