Саха сиригэр тымныы долгуна кэлэр. Кэккэ оройуоннарга -50 кыраадыс охсуоҕа. Чугастааҕы күннэргэ күн- дьыл туһунан ЯСИА УГМС начаалынньыгын солбуйааччы-Гидрометкиин начаалынньыга Татьяна Маршалик кэпсээтэ.
«Хотугулуу-арҕаа уонна арҕаа оройуоннар олохтоохторо температура намтаабытын бастакынан билиэхтэрэ. Чугастааҕы түүн Өлөөн, Мииринэй уонна Ленскэй оройуоннарыгар термометр остуолбалара -34… -39 бэлиэҕэ диэри түһүөхтэрэ, оттон сорох сирдэринэн -40 кыраадыстан намыһах буолуоҕа. Өлөөн оройуонугар, сабаҕалааһынынан, нэдиэлэ бүтүүтэ -45… -50 кыраадыска диэри тымныйыа.
Киин оройуоннарга күн-дьыл билиҥҥитэ холкутук турар, ол эрээри өрөбүллэргэ температура -34… -39 кыраадыска диэри намтыыра күүтүллэр. Илин эҥэргэ, борогунуоһунан, -40 кыраадыска чугаһыа. Өрөспүүбүлүкэ үрдүнэн кыра, сороҕор быстах хаар баар буолуоҕа. Ордук күүстээх сөҥүү Уус-Маайа оройуонугар күүтүллэр», — диэн Татьяна Маршалик кэпсээтэ.
Кини этэринэн, сэтинньи 29 күнүгэр Сахалин үрдүнэн ааһыахтаах циклон сабыдыала күүтүллэр. Ити Уус-Маайаҕа, ону тэҥэ хотугулуу-илиҥҥи оройуоннарга, Өймөкөөн оройуонугар уонна Халыма-Индигир уокуругар температура арыый үрдүүрүгэр тиэрдиэн сөп.
Чэппиэр сарсыарда, сэтинньи 27 күнүгэр, саамай тымныы күн Уус Ньараҕа олохтонно, онно -51 кыраадыһы бэлиэтээтилэр.
