Көхтөөх циклоннар Саха сиригэр былыттаах, хаардаах күннэри аҕаллылар. Ортотунан температура 10-15 кыраадыска үрдээтэ. Сылыйыы төһө өр хааларын ЯСИА Саха сиринээҕи УГМС салайааччытынн солбуйааччы — Гидрометкиин начаалынньыга Татьяна Маршалик кэпсээтэ.
«Көхтөөх циклоннар Саха сирин арҕаа өттүгэр тураллар. Былыт уонна “фронт” киин оройуоннарга тиийдилэр. Хаар барытыгар баар, сорох сирдэринэн — күүстээх. Арҕаа – күүстээх тыал, сөкүүндэҕэ 15-20 миэтэрэҕэ тиийэр. Нэдиэлэ бүтүөр диэри барыта сыыйа уоскуйуоҕа. Циклон биһиги территориябытыттан барыа, баттааһын намтаан барыа, нуормаҕа төннүөхпүт – күнүс -27 кыраадыска, түүн — -33-кэ диэри. Нэдиэлэ бүтүүтэ итинник көрдөрүүгэ тиийиэхпит. Сүрүн сөҥүү бу ааһар, салгыы кыратык хаардыаҕа», — диэн ЯСИА Татьяна Маршалик кэпсээтэ.
Сэрэдэҕэ, сэтинньи 19 күнүгэр, Дьокуускайга күнүс -16… -18 кыраадыс, киин оройуоннарга -16… -21, арҕаа өттүгэр -10… -15 диэри эрэннэрэллэр. Ордук сылаас соҕуруу буолуо, онно -5… -10 кыраадыс сабаҕаланар. Илин өттүгэр -26… -31 күүтүллэр.
«Саха сирин территориятынан температура ортотунан 10-15 кыраадыска үрдээтэ. Араас сылларга бу кэмҥэ сылаас буолара. Циклоннар тахсалларыгар сылыйыы — үгэс буолбут көстүү. Онон бу улахан аномалия диир сыыһа», — диэн Татьяна Маршалик эбэн биэрдэ.
